Қарағанды облысының Теректі кентіндегі "Алтай Полиметалл" кәсіпорнынан жұмыстан шығарылған жүзден астам азаматтың мәселесі әлі шешілген жоқ. Бұған дейін кеншілер кәсіпорын басшылығы 150 адамды жұмыстан қысыммен шығарды деп, наразылықтарын білдірген. Дау тіпті елдің Бас мемлекеттік еңбек инспекторына дейін жеткен еді. Алайда еңбек инспекторлары құқықтарын қорғауды сұрап, ұжымдық арыз жазған жұмысшылардың мәселесін тексеруге асығар емес. Ал комбинат басшылығы кеншілер заң аясында жұмыстан босатылды деп отыр. Мәселені Диана Сапарқызы тағы да бір зерттеп көрді.
26 сәуір күні Теректідегі «Алтай полиметаллы» жұмысшылары наразылыққа шыққан болатын. Кеншілер "кәсіпорын басшылығы қаңтардан бастап 150 адамды еш себепсіз, қоқан-лоқы көрсетіп жұмыстан қуды" деген еді. Тіпті қыстың қақаған аязына қарамастан, жұмысшыларды отбасымен бірге қызметтік үйлерінен шығарды дегенді де айтқан. Жұмыстан босатқаны былай тұрсын, тиісті өтемақы да төлемеді деп шағымданған.
Кәсіпорын басшылығы жүздеген адамды жұмыстан шығарғандарын мойындап отыр. Нақты 116 адамды қаңтардан бастап кетірдік дейді. Бірақ барлығы заң аясында шығарылған деп ақталды.
МЕЙІРЖАН ЖҮНІС, «Алтай полиметаллы» ЖШС Бас директорының орынбасары:
– Ешкім жұмыстан қуылған емес, это было все в рамках закона. Некоторые по собственному желанию уволились и некоторые по дисциплинарному вызысканию, первое замечание второе замечание, у нас своя комиссия дисциплинарная, каждый индивидуальный случай выносятся на комиссию.
Кеншілер құқықтарын қорғауды сұрап еңбек инспекциясына шағым жібергендерін айтады. Алайда, ондағылар тексерістің енді тағайындалғанын хабарлады.
САҚЫПЖАМАЛ САФАРОВА, Қарағанды облысы еңбек инспекциясының бөлім басшысы:
– "Алтай полиметалл" кәсіпорының жұмыскерлерінің ұжымдық өтініші келіп түсті. Осы өтініш негізінде басқарма тарапынан жоспардан тыс тексеріс тағайындалды. Нәтижелері бойынша қосымша хабарлаймыз.
Ал бұған дейін Қазақстанның Бас мемлекеттік еңбек инспекторы Төлеген Оспанқұловтың өзі мәселені шешу үшін жұмыс берушіге 30 сәуірге дейін уақыт берілгенін хабарлаған еді. Және сол күні тараптардың дауы Қарағанды облысы жанындағы штаб отырысында қаралады деп сендірген. Бірақ, кеншілерден ұжымдық арыз түссе де, мамандар тексерісті бастап, мәселені шешуге асығар емес. Сондықтан, тараптардың дауына қашан нүкте қойылатыны әзірге белгісіз.
«Алтай полиметаллы» компаниясынан ұрлық жасады деген күдікпен кеше үш азамат қамауға алыныпты. Қазір олардың былтыр тамыз және қыркүйек айларында болған ұрлыққа қатысы бар-жоғы анықталып жатыр.
БАҚЫТЖАН ҚҰДИЯРОВ, Қарағанды облысы Полиция департаментінінің ресми өкілі:
– Аталған кәсіпорындағы болған оқиғаға байланысты ҚР ҚК 188 бабы яғни ұрлық бабы бойынша қылмыстық іс қозғалды. Қазіргі уақытта полиция қызметкерлерімен осы іске қатысы бар деген үш азамат аудандық полиция бөліміне жеткізілді. Қылмысты жан-жақты ашу және тергеу бойынша кешенді іс шаралар жүргізілуде.
Бізді әлеуметтік желіде оқыңыздар:
Youtube -[ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
WhatsApp Информбюро +7 777 331 31 31
