ཚང་མ་ལྷ་བཟང་། དེ་རིང་ཕྱི་ལོ་ ༢༠༢༤ ཕྱི་ཟླ་ ༡༢ ཚེས་ ༢༥ ནི་དགའ་ལྡན་ལྔ་མཆོད་དང་༸གོང་ས་རྒྱལ་བ་ཡིད་བཞིན་ནོར་བུའི་བླ་གཟའ། སྟོན་པ་ཡེ་ཤུའི་འཁྲུངས་སྐར་བཅས་དུས་ཆེན་གསུམ་འཛོམས་པའི་དུས་ཆེན་ཁྱད་པར་ཅན་ཞིག་ཡིན་པས་ཚང་མར་བཀྲ་ཤིས་བདེ་ལེགས་ཞུ།

དེ་རིང་ང་ཚོ་ཊོ་རོན་ཊོའི་ལྷ་སྐར་གྱི་རང་དབང་འཐབ་རྩོད་པ་རྣམས་ཀྱིས་ཞོགས་པ་ཊོ་རོན་ཊོ་རྒྱ་ནག་གཞུང་ཚབ་ཁང་མདུན་དུ་ཆུ་ཚོད་བརྒྱད་པ་ནས་ཞི་བའི་ལས་འགུལ་སྤེལ་ཡོད། སྤེལ་དགོས་དོན་ནི་བོད་རང་བཙན་ཤོར་ནས་ལོ་ངོ་ ༦༥ འགྲོ་བཞིན་ཡོད་པའི་བོད་ལ་རང་དབང་དགོས་པ་དང་། ༸རྒྱལ་བ་རིན་པོ་ཆེ་བོད་ལ་ཕེབས་དགོས་པ། རྒྱ་ནག་དམར་གཞུང་གིས་བཙོན་འཇུག་བྱས་པའི་༸པཎ་ཆེན་རིན་པོ་ཆེ་གཙོས་པའི་བོད་མི་རྣམས་གློད་བཀྲོལ་གཏོང་དགོས་པ། བོད་ཀྱི་སྐད་ཡིག་དང་ཆོས་དད་རང་དབང་དགོས་པ་སོགས་ཀྱི་ཆེད་དུ་ཡིན། ལས་འགུལ་སྤེལ་མཁན་བོད་མི་གཞོན་སྐྱེས་ཚོ་དང་བོད་མི་ཧ་ཅང་མང་པོ་ཕེབས་འདུག་པས། རྒྱ་ནག་གཞུང་ལ་བརྡ་ལན་མི་འདྲ་བ་གསར་པ་ཞིག་བཏང་ཡོད། ཁོང་རྣམས་དང་ལྷ་སྐར་གྱི་ཚོགས་མི་ཚང་མར་བཀའ་དྲིན་ཆེ། ཧ་ཅང་ཡག་པོ་བྱུང་སོང་།

དེ་དང་འབྲེལ་ ༢༠༢༤ ལོའི་ལྷ་སྐར་མཐའ་མ་དེ་ཡིན། ཕྱི་ལོ་ ༢༠༢༥ ལོའི་ལོ་གསར་པའི་ཕྱི་ཟླ་དང་པོའི་ཚེས་གཅིག་དེ་༸རྒྱལ་བ་ཡིད་བཞིན་ནོར་བུའི་སྐུ་ཡི་བླ་གཟའི་ཉིན་མོ་དང་ལྷ་སྐར་རེད་འདུག་པས་དཔེ་ཡག་པོ་བྱུང་འདུག དེའི་ལྷ་སྐར་གྱི་འཐབ་རྩོད་དེ་ཉིན་བོད་མི་གང་མང་མང་པོ་འདུ་འཛོམས་གནང་རོགས་ཞུ་རྒྱུ་ཡིན། མཐར་༸རྒྱལ་བ་ཡིད་བཞིན་ནོར་བུ་སྐུ་ཚེ་བརྟན་པ་དང་བོད་ལ་བདེ་སྐྱིད་ཀྱི་ཉི་མ་མྱུར་དུ་ཤར་ནས་གཞིས་བྱེས་མཉམ་འཛོམས་ཡོང་བའི་བཀྲ་ཤིས་སྨོན་འདུན་ཞུ། རྒྱལ་ལོ། རྒྱལ་ལོ། བོད་རྒྱལ་ལོ།

happy lhakar sang and happy merry Christmas 🎄
Wednesday December 25th 2024
Toronto lhakar freedom movement Canada!
Long live H.H the great 14th Dalai Lama of Tibet!

свернуть