Lajme Arkiva 2004
Seanca parlamentare ka nisur me interpelancën e kërkuar nga deputeti demokrat Sokol Olldashi me Kryeministrin Fatos Nano lidhur me sigurinë në rrugë, nisur nga aksidenti tragjik i 16 kosovarëve nga Malisheva në Urën e Bicajve në Fushë-Arrëz. Kryeministri Nano në përgjigje radhiti disa shifra, sipas të cilave, numri i aksidenteve gjatë dy viteve të fundit është ulur 22% dhe në 95 % të rasteve faji i takon drejtuesëve të mjetit dhe jo shtetit duke përfshirë këtu dhe aksidentin e 14 tetorit. Megjithatë, shefi i qeverisë siguroi se brenda këtij viti do të përmirësohen 60 pika rreziku, sipas tij, kostoja e standardeve evropiane për sistemin rrugor kushton 2.2 miliardë euro.
Fatos Nano: “Për kusjet dhe kolegët e tij opozitarë asnjëherë më parë nuk ishin shqetësuar për bashkëkombësit vet të aksidentuar, por tentojnë tani të shfrytëzojnë për interesat dhe propagandë politike ndjenjat patriotike të të gjithëve ndaj vëllezërve kosovarë.”
Sokol Olldashi: “Menjëherë pas aksidentit ne akuzuam administratën e zotit Nano si shkaktar i tragjedisë dhe këtë akuzë e formuluam vetëm pasi u bindëm se, nëse do të ishin zbatuar aktet normative dhe urdhëresat e veta që administrata e Nanos ka miratuar, aksidenti do të ishte shmangur dhe 15 gjimnazistët e Malishevës do të ishin sot bashkë me moshatarët e tyre duke u përgatitur për provimet e dimrit edhe zoti Nano do të mund të vazhdonte i qetë hazdisjet në buzukun Ilia të Selanikut pa qenë i detyruar të paguajë me 16 jetë shqiptarësh karafilat e kuq për greken Pegi Zina.”
Fatos Nano: “Kur unë isha në vizitën e radhës zyrtare në Bukuresht, zoti Olldashi, nën drejtimin e mjetit të tij, pronë e kuvendit, u përplas në pjesën më të mirë të autostradës në 6 km që ka bërë zoti Berisha te zona industrialenë orën 1:00 dhe me sa duket pasoja e vetme, për fat të Zotit të madh, qenka vetëm gjendja e tij haluçinante e kësaj interpelance.”
Sokol Olldashi: “Është shumë e vërtetë që në datën që thotë zoti Nano një njeri i tipit të tij goditi makinën time nga mbrapa, gjë që mund të dokumentohet fare kollaj nga procesverbalet e kuvendit.”
Kuvendi miratoi përbërjen e komisionit hetimor për prokurimet për të vijuar më pas me shqyrtimin e projektvendimit të hartuar nga 25 firmëtarët e opozitës për akuzat e Kyreministrit Nano për implikim në trafikun e armëve dhe aksidentin e Shkallnurit. Në sallën e Kuvendit u shpalosën shpesh nene të ndryshme të Kodit të procedurës penale si nga pozita dhe nga opozita. Shumica argumentonte se çështja i duhet lënë prokurorisë, ndërsa pakica këmbëngul se institucioni i akuzës kërkon ta mbyllë këtë çështje, madje duke fshehur dhe provat. Nga ana tjetër nënkryetarja Makbule Çeço kërkoi shpalljen e diplomatëve të implikuar në përgjimin e kryeministrit si persona të padëshirueshëm.
Sali Berisha: “Prokuroria e Përgjithshme ka pasur, sipas autorit të transkriptimit, ka pasur dokumente të transkriptuar dhe shiritin nga është bërë transkriptimi.”
Gramoz Ruçi: “Është kollaj të shpifësh, por ju e ktheni në shumë pak sekonda në bindje shpifjen tuaj, madje të impononi me shumë forcë, që këtë bindje që krijoni për shpifjen e sajuar dhe të ngritur, të bindni gjithë të tjerët. Është e pamundur.”
Nikollë Lesi: “Ai i fiton zgjedhjet me 60% nëse komisioni hetimor në fund e nxjerr të larë, të pafajshëm, unë shkoj në burg, ai humb zgjedhjet.”
Makbule Çeço: “Një ambasadë e huaj është involvuar në një veprimtari të paligjshme për të cilën duhet protestuar së pak për këtë lloj veprimtarie deri në shpalljen ‘non grata’ të njerëzve të kësaj ambasade që implikuan në këtë veprimtari të paligjshme.”
“ Nuk mund të ketë ndjekje penale për një çështje. Ka ndjekje penale për individë të caktuar dhe duke qenë kështu, unë mendoj që prokuroria nuk po bën gjë tjetër veçse po tenton që të mbyllë siç ka mbyllur dhe çështje të tjera.”
“Atë burrin atje, as Zoti nuk i bën derman, jo Gramoz Ruçi.”
Skënder Gjinushi: “Është pushteti gjyqësor, kurse prokuroria nuk është ndonjë pushtet më vete, kështu që dhe ajo fraza që mos prek pushtetet e tjera nuk është ndonjë pengesë. Shërbimi informativ pastaj merre leje, në rastin e kryeministrit s’ka kujt ti marrë leje, sepse kryeministri jep leje për ministrat kështu që duhet t’i kërkonte për veten dhe me ligjin e ’97-ës, kryeministri është drejtori real i shërbimit informativ.” /tvklan.al
SUBSCRIBE to “RTV KLAN” on YouTube for more videos!
Për më shumë informacione vizitoni faqen tonë web [ Ссылка ]
Videot e fundit nga Tv Klan i gjeni në faqen [ Ссылка ]
Follow Tvklan on Facebook: [ Ссылка ]
Follow Tvklan on Instagram: [ Ссылка ]
Programet e Tv Klan mund t’i ndiqni edhe në faqen [ Ссылка ]
