Келесі жылы зейнетақының көлемі артып, мұғалімдер мен дәрігерлердің жалақысы өседі. Коронавирус кезінде биылғы міндеттерін соңына жеткізбеген үкімет енді келер жылы Парламентке ұсынатын заң жобаларын жоспарлап жатыр. Биыл қабылдануы көзделген 17 заң жобасының екеуі жүзеге асырылмай қалыпты. Үкімет енді 25 заң жобасымен жұмыс істеуге дайындалуда.
Келер жылы Үкімет қазақстандықтарға бірінші қаңтардан бастап зейнетақы қорындағы ақшаларын алуға рұқсат беруді жоспарлаған. Алайда оның заңы әлі қабылданған жоқ. Жобаға 5 өзгерту енгізіп кеше сенат оны мәжіліске қайта жіберді. Үкіметтің тағы бір жоспары - 2021 жылы мұғалімдер мен дәрігерлердің, 38 мыңнан астам әлеуметтік сала мамандарының да жалақысын көтеру.
ӘСЕЛ АЛТЫНБЕКОВА, ҚР Еңбек және әлеуметтік қорғау министрлігінің басқарма басшысы:
– Әлеуметтік сала басшылары мен негізгі қызметкерлердің жалақылары екі кезеңде көтерілетін болады. Сондай-ақ әкімшілік және көмекші қызметкерлердің де жалақысы 20-30 пайызға артады.
Ал 2019 жылдан бері өзгеріссіз келе жатқан ең төменгі табыс мөлшері 42 500 теңге болып қалады. Ал айлық есептік көрсеткіш 139 теңгеге артады екен. Яғни, мүгедектер мен көпбалалы аналар мемлекет есебінен төленетін жәрдемақыларын 2-3 мың теңгеге артық алады. Ал қоғам белсендісі Азаматхан Әміртайдың айтуынша, халық пен билік арасындағы байланысты күшейтпей ешқандай заң нәтиже бермейді. Ол ең әуелі халық үшін шырылдап жүрген белсенділерді қолдайтын заң қажет дейді.
АЗАМАТХАН ӘМІРТАЙ, ЭкоАльянс төрағасы:
– Біздегі қазіргі парламентте қазіргі отырған ұйқыбас депутаттар олар бір жақты сол олигархтар мен биліктің ықпалыменен солардың ғана арманын, солардың ғана мақсатын орындап отыр. Ал халықтың ойы, халықтың назы заңдарда қарастырылмай кетіп жатыр.
Биыл пандемиядан тәлтіректеп қалған кәсіпкерлер келер жылы әлеметтік медициналық сақтандыру қорына биылғыдан көбірек жарна аудара бастайды. Бірінші қаңтардан бастап жалдамалы жұмыскерлер жалақысының 2 пайызын, ал жеке кәсіпкерлер мен өзін-өзін жұмыспен қамтып отырғандар табысының 5 пайызын қорға жібереді. Сонымен қатар зейнетақы 7 пайызға артады. Алайда жыл басынан жалақы көбейсе, қымбатшылыққа ұрынатын халық бұған да аса қуанып отырмаған сыңайлы. Өйткені биылғы қымбатшылық кезінде үкімет бағаны ұстай алмай, үкімет пен әкімдер президент тапсырмасын орындаусыз қалдырған болатын.
Гүлназ Сайлауқызы, Дидар Елеуов
Бізді әлеуметтік желіде оқыңыздар:
Youtube -[ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
WhatsApp Информбюро +7 777 331 31 31
#зейнетақы #жалақы
