Naxçıvan-Marağa memarlıq məktəbinin ən qiymətli nümunələrindən biri olan Əlincə qalası dünya əhəmiyyətli abidələr siyahısına daxildir.
Culfa rayonunun Xanəgah kəndində Əlincəçayın sahilində yerləşən qalanın tarixi ilə bağlı müxtəlif fərziyyələr mövcud olsa da, türk səyyahı Övliya Çələbi Əlincə qalasının Səlcuq hökmdarı Qütbəddin II Məlikşah dönəmində 1188-1192-ci illərdə inşa edildiyini yazır. Araşdırmaçılar isə qalanın tarixinin daha qədimə VII-IX əsrlərə qədər uzandığını deyir. Müxtəlif dövrlərdə fərqli dövlətlərin hakimiyyəti altında qalıb dağıdılsa da, qala öz əzəməti və strateji əhəmiyyəti hər zaman qoruyub.
Qalanın inşasında bişmiş kərpicdən, yonulmuş iri daşlardan istifadə olunub. Əlincə dağının ətəyində yerləşən və onun zirvəsini əhatə edən qalanın ən uca hissəsində - 1700 metr yüksəklikdə onun iç qalası yerləşir. Qalanın kiçik şəhərciyi xatırladan mərkəzi hissəsində yaşayış və ictimai binaların dağıntıları yerləşir. Burada təndir qalıqları, əl dəyirmanı, geniş su hövzəsi aşkar olunub. Qala 2007-ci ildə dünya əhəmiyyətli abidələr siyahısına daxil edilib.
