Դատական համակարգի առողջացումը պետությունն սկսում է դատավորների բարեվարքության ստուգումից ՝ «Ռադիոլուրի հյուրասրահում» ասել է Բարձրագույն դատական խորհրդի անդամ Գրիգոր Բեքմեզյանը և բացատրել, թե ինչով է այդ ստուգումը տարբերվելու վեթինգից։
«Փորձում ենք ոչ թե կացնային տարբերակով գնալ, այլ համակարգ ներդնել, որ իրավական մեխանիզմներով հասկանանք՝ արդյո՞ք դատավորը բավարարում է պահանջներին, թե՞ ոչ»։
Դատավորի բարեվարքության ստուգում, նրա գործունեության գնահատում նախատեսվում է Դատական օրենսգրքում կառավարության առաջարկած փոփոխությունների նախագծով։
Գնահատումը վերաբերելու է թե գործող դատավորներին, թե դատավորի թեկնածուներին։ Առայժմ անորոշ է հարցը, թե դատավորի նախկին գործունեության որ հատվածն է ստուգվելու կամ մինչև ուր է հետ գնալու գործընթացը։
«Պետք չէ հակաիրավական ճանապարհով ստուգել դատավորի բարեվարքությունը։ Եթե հասկանանք, որ չկա այնպիսի մեխանիզմ, որը հնարավորություն կտա ստուգել նախկինում ձեռք բերվածը, ապա գիծ կքաշենք և ստուգումը կսկսենք այս պահից։ Եթե գտնենք մեխանիզմ, որը կլինի օբյեկտիվ և արդար, կգնանք այդ ճանապարհով»։
ԲԴԽ- ում համաձայն են առաջինն անցնել բարեվարքության ստուգատեսը։ «Այո, առաջինը մեզ պետք է ստուգեն, քանի մեր որոշումները պետք է ընդունելի լինեն բոլոր կողմերի համար, ուստի մեր նկատմամբ պետք է լինի բարձր վստահություն»,- ասել է ԲԴԽ անդամը։
Փոխարենը` ԲԴԽ–ում համաձայն չեն դատավորների հավակնորդների համար տարիքային շեմը քսանութից քսանհինգ դարձնելու առաջարկին։ Կառավարությունը կարծում է, որ այս փոփոխությունը թույլ կտա դատական համակարգ ներգրավել երիտասարդ, կասկածելի կամ վարկաբեկող կապեր չունեցող անձանց:
ԲԴԽ–ում կարծում են, որ երիտասարդությունը անհրաժեշտ, բայց բավարար նախապայման չէ։
«Միևնույնն է, վերջնական որոշումը՝ անձը կդառնա՞ դատավոր, թե՞ ոչ , ԲԴԽ–ինն է, և մենք որոշում կայացնելիս մեր մոտեցմամբ կառաջնորդվենք»,- ասել է ԲԴԽ անդամը։
