السيرة الذاتية

ياسلام الله على بريةٍ برية
ودلة فنجالها عمس الحجاج يفله

عند رجالٍ من اهل الجود والجاهية
شيخ ناقي بنها مثل نقاوة بله

ويا سلام الله على المشوار والبرية
والكلام إذا انتقينا منه ماهو كله

الصحيح إنا بشر واحلامنا وردية
والطريق احيان نجهل به ونوب ندله

وكل واحد له فعول وسيرةٍ ذاتية
محتويها دفتره ومسجلة بسجله

شئ منها معلنه والباقية مخفية
كم من زلة وكم هفوة وكم من خله

وعندما نبدا الكلام ونمتدح شخصية
لو كثير من العباد نقدره ونجله

ما وجدنا فوق سطح الكورة الأرضية
مثل سيرة واحدٍ كل المديح اهلٌ له

عن صفاته تقصر الاشعار والقافية
والكلام ان كان ما يثني عليه نمله

(خُلقه القرآن ) وصف وترجمة فعلية
مرسله ربه وحبه في القلوب جبله

رحمة مهداه وافعاله ماهي وهمية
الحرام يحرمه والا الحلال يحله

بالتواضع والمكارم سيرته مروية
ذِكْرها يغنيك عن دق الكلام وجله

الرسول اللي لنا من هجرته هجريه
ومن تعاليمه لنا منهج حياة ومِله

إن حدينا عن طريقه جاتنا مثنيه
وإن لزمنا منهجه فزنا لو إنّا قِله

والله ان رسالته قبل الف وأربعمائة
ازهقت باطل وجات بحق وأبرت عله

قلت ماعندي وصلى الله على نبيه
ونسأله يوم الحساب يظلنا في ظله
عبدالله وصل السُلمي
1442/1/7

свернуть