Artıq bir neçə gündür Lənkəranın çay sahələrində üçüncü çay yığımına başlanılıb. Bu dəfəki məhsuldarlıqdan fermerlər razıdır. Onların narazılığı isə texnikanın olmaması və fabriklərin çayı onlardan ucuz qiymətə almasıdır.

Lənkəranın Vilvan kənd sakini fermer Vidadi Mənəfov çayın üçüncü yığımında məhsuldarlığı bir qədər artıra bilib.

Fermer buna aparılan aqrotexniki qulluq və yığım qaydalarına düzgün riayət etməklə nail olduğunu bildirir: “Üç gündür üçüncü dərimə başlamışıq və dərim 10 gün davam edəcək. Texniki qulluqlar etmişik. Suvarmanı yerinə yetirmişik, kultivasiya vermişik. Belləmə vaxtı-vaxtında olub. Ona görə də bu üçüncü dərimdə məhsuldarlığımız var.”

Əsasən cavan kollardan ibarət olan sahədən ikinci yığım zamanı 4 ton məhsul götürən təsərrüfat sahibi üçüncü yığımda 6 ton çay yarpağı əldə etməyi proqnozlaşdırır. Fermerin məhsuldarlıq baxımından işi rəvan getsə də, çətinlikləri də az deyil.

Fermer Vidadi Mənəfov: “Kultivasiya üçün texnika alçaqdır, balacadır. Yəni çay kollarına dəyir, kultivasiya etmək mümkün deyil. Böyük texnika ilə kultivasiya etsək yaxşı olar.”

Təsərrüfat sahibini digər narazı salan məsələ isə emal müəssisələrində xam malın ucuz təhvil alınmasıdır.

Fermer Vidadi Mənəfov: “Bir manatdan təhvil veririk. Bu da bizim zəhmətimizə dəymir. Qiymət ucuzdur. Yəni 1 manat 50 qəpik, 2 manat arası olsa bir az yaxşı olar. Bunlar bizim xərcimizi ödəmir.”

Dördüncü cay yığımına isə sentyabr ayının axırlarında başlanılması nəzərdə tutulub.

свернуть