Գեղարքունիքի մարզի Ծովինար համայքնում գտնվող ԵԿՄ պատանի երկրապահ ուսումնամարզական ճամբարն իր դռները բացեց պատանի երկրապահ ճամբարականների համար: Սեւանա լճի ափամերձ անտառային գոտու հատվածում իրենց ամառային հանգիստն այս տարի կանցկացնեն 3000 պատանի երկրապահներ՝ մարզիչ-հրահանգիչների, դասավանդող մասնագետների հետ:
Ճամբարի բացման հանդիսավոր արարողությունն անցկացվեց հուլիսի 2-ին:
Մինչ միջոցառման պաշտոնական մասի մեկնարկը ներկաները ծաղիկներ խոնարհեցին ճամբարում տեղադրված խաչքարի առջեւ:
Մեկնարկեց հանդիսավոր մասը:
Պատանի երկրապահ նվագախմբի կատարմամբ հնչեցին Հայաստանի Հանրապետության, Արցախի եւ ԵԿՄ-ի օրհներգերը:
Միջոցառմանը ներկա էին ԵԿՄ վարչության նախագահ Սասուն Միքայելյանը, փոխնախագահները, վարչության անդամները, ԱԺ Պաշտպանության եւ անվտանգության մշտական հանձնաժողովի նախագահ, ԵԿՄ վարչության անդամ Անդրանիկ Քոչարյանը, Կրթության, գիտության, մշակույթի եւ սպորտի նախարար Վահրամ Դումանյանը, Պաշտպանության նախարարի տեղակալը, գեներալներ, հրամանատարներ, համայնքապետեր, պետական, քաղաքական եւ ռազմական գործիչներ, ԵԿՄ տարածքային բաժանմունքների եւ մարզխորհրդի նախագահներ, պատանի երկրապահների ծնողներ, հոգեւորականներ, հյուրեր:
Օրհնության խոսք ասացին հոգեւորականները:
Ողջույնի եւ շնորհավորանքի խոսք ասացին ԱԺ պաշտպանության եւ անվտանգության հարցերի մշտական հանձնաժողովի նախագահ Անդրանիկ Քոչարյանը: Պաշտպանության նախարարի անունից ողջույնի խոսք ասաց նախարարի տեղակալ Արման Սարգսյանը:
Կրթության, գիտության, սպորտի եւ մշակույթի նախարար Վահրամ Դումանյանը շնորհավորելով պատանի երկրապահ ճամբարականներին նշեց, որ յուրաքանչյուր երեխա պետք է լիարժեք իրացնի կրթություն ստանալու իր իրավունքը, դառնա օրինապահ քաղաքացի:
Պատանիներին ողջույնի եւ շնորհավորանքի խոսքեր ասացին ԵԿՄ վարչության անդամ Հրանտ Սարկիսովը, Սփյուռքից ժամանած Հակոբ Ավագյանը, Գեղարքունիքի փոխմարզպետ Ռուբիկ Նավոյանը:
25 տարի գործում է «Պատանի երկրապահ» ակումբը: Շուրջ 14 տարի Պատանի երկրապահ ուսումնամարզական ճամբարն ընդունում է իր հյուրերին` եռասերունդ երկրապահին: Մինչեւ օգոստոսի վերջ այստեղ իրենց ճամբարային առօրյան կանցկանեն հանրապետության բոլոր մարզերի, մանկատների, Արցախի, սփյուռքի պատանի աղջիկներ եւ տղաներ: Ճամբարում յուրաքանչյուր ստորաբաժանում ունի իր հրամանատարը, յուրաքանչյուր օրվա համար նախատեսված է դասացուցակ-օրակարգ, որը հիմնականում մոտեցված է զինվորական կարգացուցակին: Օրակարգում ընդգրկված են նաեւ ուսումնական, մրցույթային եւ հանգստի ժամեր:
ԵԿՄ վարչության նախագահ Սասուն Միքայելյանը ողջունելով ներկաներին շնորհավորանքի խոսք ասաց, հպարտությամբ նշելով, որ պատանի երկրապահ ակումբը կայացած կառույց է, որտեղ պատանի աղջիկներն ու տղաները ստանում են անհրաժեշտ բազմաբնույթ գիտելիքներ՝ հատկապես ռազմական:
Պատանի երկրապահ Ռուբեն Ալոյանը հերթական անգամ եկել էր ճամբար մեծ ոգեւորությամբ, Հայկ Շահինյանն էլ բանաստեղծություն կարդաց ներկաների համար:
Հանդիսվոր միջոցառումը ավարտվեց պատանի երկրապահների շարային քայլերթով:
Այնուհետեւ ներկաները շրջայց իրականացրեցին ճամբարում, ծանոթացան խոհանոցային պայմաններին: Սնունդը այստեղ տրվում է օրական երեք անգամ, որն անցնում է համապատասխան նմուշառման:

свернуть