Астанада 60-қа жуық кәсіпорынның басын қосқан байқау мәреге жетіп, «Қазақстанның үздік тауары» көрмесінде елордалық үздік өндірушілер анықталды. Додаға кәсіпкерлер мен стартап жобалардың иелері де белсене қатысты.
Осымен 10 жыл қатарынан ұйымдастырылған шараның мақсаты – отандық өнімді насихаттау, тауарлардың сапасын жоғарылату.
«Тұрғындарға арналған үздік тауарлар» номинациясы бойынша 1-орынды «Алтын Орда» авторлық дизайн үйі жеңіп алды. Кәсіпорын басшысы Ырза Тұрсынзада өнімдерін бізден бөлек Біріккен Араб Әмірліктері, Швейцария, Германия, Италия, Франция мен ТМД елдеріне экспорттайды.
Ырза Тұрсынзада «Алтын Орда» авторлық дизайн үйінің басшысы
-Мұндай жәрмеңке отандық өнім өндіретін мекемелерге ауадай қажет. Біз осы жәрмеңкеде тек өзіміздің өнімімізді ғана көрсетпейміз. Ең алдымен тұтынушымен тікелей сұхбаттамыз. Келешектегі өніміміздің сапасына үлкен әсер етеді.
Нұржан Әлтаев, ҚР «Атамекен» ҰКП басқарма төрағасының орынбасары
-Осы жылдан бастап бұл конкурс ұлттық кәсіпкерлер палатасының қарамағына өтті. Енді кәсіпкерлердің өздері таңдайтын болады. Біз комиссияларға кәсіпкерлік ассоциацияларды кіргіздік. Қоғам қайраткерлерін кіргіздік, солар таңдайды.
