القضاء على الدولار.. هدف بريكس الأساسي.. لماذا..وهل تستطيع؟
المجموعة دي من ساعة مااتعملت وهي ليها هدف رئيسي .. وهو القضاء على هيمنة الولايات المتحدة وتحديدا الهيمنة الاقتصادية، لإنه لا بد من وجود قطب اقتصادي تاني يواجهة الهيمنة الغربية بقيادة أمريكا.
قادة التكتل دا شافوا إن الطريق لتحقيق الهدف ده هيكون من خلال حاجتين مهمين، الأولى إنهم يوجدوا بديل لمؤسسات التمويل الدولية اللي بتعتمد عليها الدول زي صندوق النقد الدولي والبنك الدولي، وطبعا أي دولة أمريكا هتغضب عليها مش هتاخد تمويل.

أما الطريقة التانية .. إنهم يوجدوا بديل لعملة الاحتياطي الدولي وهي الدولار الأمريكي .. واللي مستحوذ على أكتر من 84% من حجم معاملات التبادل التجاري بين دول العالم ، مقابل 4.5% بس لليوان الصيني.. وبالتالي شاف قادة المجموعة إن من الظلم لاقتصادياتهم إنهم يتعاملوا بالدولار.
بالذات إن أمريكا بتتبع نظام استبدادي يهمها فيه مصلحتها وبس، وشوفنا دا مثلا في العقوبات اللي مفروضة على إيران أو روسيا أو أي دولة هتخالفها..
طب سيبك من دا كله.. أمريكا عشان مصلحتها ممكون تموت العالم كله من الجوع، ودا اللي بيحصل فعلا من أول شهر مارس 2022، لحد دلوقتي، من ساعة الحرب الروسية الأوكرانية، وأمريكا عمالة ترفع في أسعار الفايدة على الدولار.. السؤال هنا بقاا.. دا يأثر على العالم أزاي..
ببساطة كدا احنا قولنا إن تقريبا كل دول العالم بيستوردوا بضاعتهم بالدولار حتى لو هيشتروها من دولة تانية غير أمريكا، فطبعا أنت لما بترفع سعر الفايدة على الدولار.. سعر الدولار قدام عملة البلد اللي عايزة تستورد بيزيد.. يعني على سبيل المثال.. لو السودان محتاجة تبدل 100 مليون جنيه سوداني عشان تشتري بضاعة بـ10 مليون دولار، فبعد رفع الفايدة على الدولار السودان هتحتاج 150 مليون جنيه عشان خاطر تشتري نفس البضاعة، يعني الحاجة اللي ب100 هتبقى ب150، يعنى ارتفاع أسعار وزيادة معدلات التضخم وبلاوي كتير..
الحاجة التانية هي إن الدول الفقيرة عايشة على الاستلاف والاقتراض من الدول الغنية عشان تعرف تعيش وتشتري قمح وبنزين وغيره.. فأي فلوس بتقترضها من أمريكا مثلا بيجي وقت وبتردها تاني بس بيبقى عليها فايدة معينة، فلما أمريكا تزود الفايدة يبقى تكلفة التمويل دي هتزيد جامد، وبالتالي الدول مش هتقدر تسدد، وممكن تعلن إفلاسها، أو ممكن محدش يسلفها أصلا على اعتبار انها مش هتعرف تسد.
وخلي بالك مش البلاد الفقيرة بس اللي بتستلف.. دي أمريكا نفسها بتقترض من دول تانية أو من البنوك العالمية، بس تخيل أمريكا بتستلف الدولار.. يعني لو جت تسدد ومعرفتش هتطبع شوية وتسد، ودا طبعا الخيار الأخير والأصعب عشان كدا هي استلفت في الأول ومطبعتش علطول.
كل دي أسباب تخلي دول العالم تفكر في حل يخليهم يستغنوا عن الدولار.. ولكن السؤال المهم.. هل دا ممكن أصلا؟

свернуть