جاران تەنیا دوژمنان دەیانویست بتکوژن
ئێستا هەم یاران و نەیاران
جاران تەنیا دووپشک و مارەکان
ئەیانوویست پێتەوە بدەن
بەبێ خۆت و بەبێ بار و بەبێ بەرگ
ماوەیەکە جگە لە گەمارۆی پاشاکان
عاشقەکانیش دەیانەوێت گەمارۆت بدەن
هێندە جوان بوویت
کامڵ بوویت بۆ تیرێکی کتوپڕ
وەک میوە گەیویت بۆ مەرگ
جاران تەنها گوللە زامداری ئەکردی
ئێستا هەم تیر و هەم بەرد وهەم مەشتەر
جاران تەنها شیعرەکانیان دەسوتاندی
ئێستا هەم دەست هەم ڕۆحت و هەم سەر
ماوەیەکە جگە لەپەلاماری خەڵک
بەهاریش پەلامارت دەدات
ماوەیەکە بۆ ئەم دەستە سپییانە
بۆ ئەم دڵە پاکەکانی دوێنێش
هاتویتەتە بەر، هێندە جوان بوویت
کامڵ بوویت بۆ کۆچێکی دوور
پێگەیویت بۆ سەفەر
جاران تەنها لە هەندێ کوچە دەریان دەکردی
ئێستا بوویت بە تەیرێکی نەخۆش
بەبێ شوێن، بەبێ لانە، بەبێ باڵ
هێندە جوان بوویت
باشیت بۆ تپی ئەمڕۆ
کامڵ بوویت بۆ نەفرەتی ئەمساڵ
جاران تەنها
پادشاکان و میرەکان و خواجەکان دەیانویست بتکوژن
ئێستا زاناکان و داناکان و شاعیران
ئەزیزم
خەم مەخۆ، هێندە جوان بوویت
کامڵ بوویت بۆ ژەهری
کامڵ بوویت بۆ خەنجەری دۆستان
