Извадок од говорот на пратеникот Маријанчо Николов, 52 седница на Собрание на Република Македонија.
Ве повикувам пред да почнам со образлагање на ова законско решение, бидете претставници на граѓаните, бидете вистински храм на демократијата и претставнички дом на стечајците, подржете го законот. Ајде да го решиме проблемот со стечајните работници во Република Македонија. Да ја затвориме социјалната компонента на неправедната транзиција. Да им овозможиме на овие луѓе, подобар живот и подобра надеж, да им овозможиме не само на стечајните работници, туку и на нивните семејства, перспектива во животот за минимална егзистенција.
Искрено кога ја барам подршката од вас искрено мислам и посакувам да бидете претставници на граѓаните, да не ја слушате партиската наредба, да не го подржите законот. Нека се мачи владата и претседателот на државата дали ќе го потпише или нема. Вие како претставници на граѓаните, изгласајте го законот.
Кој е крив за стечајците? Бидејќи кривицата е и кај ВМРО ДПМНЕ и кај СДСМ две најголеми партии носат кривица што има стечајни работници во Република Македонија и тука не може да избегаме од одговорноста овде во собранието со стискање на зеленото копче да на овие граѓани им го решиме прашањето.
Ајде да покажеме дека Република Македонија е социјално праведна држава,дека наместо пари за врби во Вардар, панорамски тркала, скапи фасади, споменици кои сами изникнуваат , да гласаме за живите луѓе.
Семејствата на стечајците, за жал поради немаштијата се распаѓаат, неможат да се грижат за своите деца, да им обезбедат школување, или да им обезбедат на своите внуци минимум и храна во семејството. И затоа имате 2 силни одредби од уставот со кои сте должни да ги почитувате како заклетва која што сме ја дале кога сме станале пратеници и да го гласаме законот за стечајни работници.
Со законот за стечајни работници бараме, сите оние кои што останале работници без работа, поради стечај, ликвидација или технолошки вишок на претпријатието со државна сопственост, поради нивната приватизација, да добиваат од агенцијата за вработување надоместок во висина од 30% од просечно исплатената нето плата по работник во Република Македонија за предходната година. Или околу 6 300 денари. Ова право да можат да го остварат сите стечајци и стечајни работници прогласени за технолошки вишок кои на денот на стапување во сила на овој закон имале најмалку 15 години стаж.
Да не ги игнорираме проблемите туку да ги решаваме. И уште еднаш сакам на крајот да ве повикам. Бидете претставници на граѓаните, разбудете ја хуманоста, разбудете ја човечноста, бидете дарежливи и гласајте за законот за стечајните работници, само така ова собрание ќе биде вистински претставнички дом на граѓаните на Република Македонија.

свернуть