Монгол Улсын Засгийн газраас Бичигт боомтыг олон улсын жишигт нийцүүлэн өргөтгөн шинэчлэх, нэвтрүүлэх хүчин чадлыг нэмэгдүүлэх шинэчлэлийн төслийг Азийн хөгжлийн банкны хөнгөлөлттэй зээлээр хэрэгжүүлнэ.
Бичигтийн боомтыг одоогийн байгаа байршлаас хойд зүгт 2 км зайд, “Баруун-Урт - Бичигт” чиглэлийн Азийн автозамын сүлжээний “Эй Эйч-32” автозам дагуу 14 га талбайд шилжүүлэхээр төлөвлөсөн.
Төслийн хүрээнд ачаа тээвэр болон зорчигч тээврийн хэсгийн хөдөлгөөнийг тусгаарлан, зорчигч тээврийн цогцолбор, гаалийн лаборатори, инженерийн шугам сүлжээ, холбогдох дэд бүтэц, зам талбай, ногоон байгууламж бүхий цогц бүтээн байгуулалт ашиглалтад оруулна. Мөн зорчигч, тээврийн хэрэгслийг түргэн шуурхай нэвтрүүлэх орчин үеийн дэвшилтэт технологи бүхий телехяналтын систем, тээврийн хэрэгслийг автоматаар бүртгэх ухаалаг гарцууд, өндөр хүчин чадал бүхий рентген, экспортын эрдэс баялагаас автоматаар дээж авч химийн элементын агууламжийг тодорхойлох төхөөрөмжүүд суурилуулна.
Бичигт боомтын шинэчлэлийн төсөл хэрэгжсэнээр боомтын нэвтрүүлэх хүчин чадал 2-3 дахин нэмэгдэж, гадаад худалдааг хөнгөвчлөх, Монгол Улсын эдийн засгийн өсөлтийг нэмэгдүүлэхэд нэгээхэн алхам болох юм.

свернуть