Қазақстанда баспана бағасы бұрын-соңды болмаған рекордтық көрсеткішке жетті. Осы айдың өзінде пәтер құны республика бойынша орташа есеппен 3 жарым пайызға қымбаттады. Әсіресе Ақтау, Орал мен Атырауда баға қатты көтерілген. Себебі, дәл осы өңірлердегі тұрғындардан зейнетақы қорындағы шекті мөлшерден асатын соманы алуға ең көп өтініш түсіпті.
Тұрғын үй бағасының көз ілеспес жылдамдықпен өсуі, әуелі Ақтауда байқалады. Онда баспана бағасы ақпанда 13 пайызға көтеріліп кеткен. Одан кейін бір айда бірден 8 пайызға Оралдағы пәтерлер де қымбаттапты. Атыраудағы жылжымайтын мүлік те шамамен 5 пайызға өскен. Бұл өңірлердегі баспана бағасы бүгінде бір шаршы метріне 200 мың мен 300 мың теңгенің арасында. Ал мегаполис саналатын Алматыдағы үйдің бағасы бұрынан ұшып тұрғанына қарамастан, қазіргі шаршы метрінің орташа бағасы 480 мың теңгеге жеткен.
АРМАН БЕЙСЕМБАЕВ, Экономист:
– Баспана құны- нарықта үздіксіз көтеріліп жатқан бағамен пәтер алуды сатып алушылар өздері тоқтатпайынша өсе береді. Бірақ, зейнетақы қорынан қаражаттарын пайдаланатындардың тең жартысы ағымдағы ипотекаларын жауып жатыр. Бұл банктер үшін өте тиімсіз. Меніңше күзге қарай мүліктің құны бір ретке келеді. Әрі қарай көтере беру негізсіз.
Екінші нарықтағы тұрғын үй бағасы зейнетақы қорындағы жұрттың қаражатты пайдалануына қатысты болғанымен, жаңа үйлердің құны тікелей құрылыс материалдарының күрт қымбаттауы мен жұмыс күшінің жетіспеуіне байланысты дейді Қазақстанның құрылысшылар одағының өкілдері.
ЕРАЛЫ САУРАНБАЕВ, Қазақстанның құрылысшылар одағының Басқарма төрағасы:
– Баға тікелей құрылыс материалына байланысты. Мердігер компаниялардың жауапкершілігінде болатын жылжымайтын мүліктің сапасы мемлекет тарапынан қатаң бақылауда болады. Соңғы уақытта арматураның өзі 40 пайызға қымбаттаған. Құрылыс компаниялары үлкен қаржылық тәуекелге барады. Өйткені, нарық күн сайын құбылуда.
Сарапшылар, жаңадан салынған үйді зейнетақы қорындағы шекті мөлшерден асатын қаражатына сатып алғандардың саны шамамен 4 мыңға жуық дейді. Қалған елдің басым бөлігі ипотекалық қарызын жабады. Бірақ банктердің активі азайғанымен, қаржы институттары ипотекалық бағдалармалардың пайыздық мөлшерлемесін түсіре қоймайды деп отыр. Өйткені, жұмыс істейтін 9 жарым миллион халықтың ішінде зейнетақы қаржысын пайдалануға 700 мыңнан астам адамның ғана мүмкіндігі бар.
Әйгерім Ердәулет, Влад Шишко
Бізді әлеуметтік желіде оқыңыздар:
Youtube -[ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
WhatsApp Информбюро +7 777 331 31 31
#баспана #үй_бағасы
