Шымкент көшелерінің тең жартысында асфальт қабаты жоқ.
Ал жергілікті билік облыс орталығының барлық көшелері алдағы 3 жылда толығымен жөнделетінін айтады. Қазіргі таңда 5 көше қайта жөндеуден өтуде. Жаңадан екі жол мен жолайрық салынуда. Бұл жұмыстарға шаһар қазынасынан 14 миллиард теңге бөлінген. Қазір құрылыс қарқын алғанмен, жаңа жолдар 1 жылдан соң ел игілігіне беріледі. Ал өткен жылы қайта жаңартудан өткен 7 жол биыл аяқталып, пайдалануға берілді. Енді тағы да кезегін күткен 6 жолдың 6 жарым миллиард теңгеге жобасы жасалып, алда жөндеу жұмыстары басталады. Бұл көлік инфрақұрылымын дамыту шаралары Шымкенттің бас жоспары келісімінің негізінде іске асуда.
Қуатжан Жұматаев, Шымкент қалалық жолаушылар көлігі және автомобиль жолдары бөлімінің басшысы:
– 6 жолға 6,5 миллиард қаржы қарастырылды. Бұдан бөлек, біз жол құрылысына 2019 жылы 20 миллиард теңгеге жуық қаражат жұмсауды жоспарлап отырмыз. Бұл жұмыстардың барлығы бас жоспарға сәйкес атқарылуда. Ал қала халқының 100 пайыз асфальт үстінде қатынауы 2021 жылға қарай толық түрде жүзеге асады деген жоспар бар.
