TIRANE- Ministria e Mbrojtjes Mimi Kodheli nuk tërhiqet nga kërkesa e saj për të rihetuar ish-minitrin Arben Imami, për të cilin disa muaj më parë prokuroria vendosi të pushojë hetimet ndaj tij.
Nisur nga bindja e Kodhelit se Imami ka shkelur ligjin teksa drejtonte ministrinë e Mbrojtjes, shkelje këto që kanë pasur shumë dëme ekonomike, Kodheli ka kundërshtuar në gjykatën e Tiranës vendimin e prokurorisë, për pushimin e hetimeve ndaj Imamit dhe zyrtarëve të tij.
Në kërkesën për shfuqizimin e vendimit të akuzës thuhet se prokuroria ka marrë një vendim të gabuar dhe ka argumentuar jo ligjërisht faktet e paraqitura në dosje. Sipas kërkesës tashmë të depozituar në gjykatën e Tiranës, prokuroria duhet të mbledhë, prova dhe dëshmi të tjerë, që do të shërbejnë për zbulimin e të vërtetes rreth abuzimeve të pretenduara nga ministria, rreth shkeljeve të Arben Imamit. Prej 19 nëntorit, në sekretarinë e gjykatës së Tiranës është regjistruar çështja me numër 1634.
