Son həftələr Zəngəzur dəhlizi ağrısı ilə miqreni tutan İranın başı indi daha bərk ağrıyır. İsrail boyda dərdi var. Dünyanın intizarına son qoyub cəsarətlənməyi bacardı. Həmas lideri Haniyə, Hizbullah lideri Nəsrullah, SEPAH komandiri Nilfruşan. İran bu üç önəmli şəxsinin intiqamını oktyabrın 1-də aldı. Qisasın qısa xülasəsi: İsrailə atılan 180 ballistik raket, 1 ölü. Ölən də fələstinli idi. Həmin gün İsraildə törədilən terror aktı bu hücumdan daha çox can aldı - 7 ölü. İranın İsrailə zərbələri tarixdə ən böyük ballistik raket hücumu hesab edilir. Raketlərdən çox azı hədəfi vura bildi. Amma İran Nevatim aviabazasının zərər görməsinə nail oldu. Hər halda göstərdi ki, kütləvi ballistik raket buraxa, “Dəmir Günbəz”i yara bilir. Qisas belə olmalı idimi? Tehranın potensialını düşünsək, bəlkə də bu, İran üçün güclü hesab edilə bilər. İranlılar da belə düşünmüş olmalıdır ki, gecə küçələrə çıxıb bayram edirdilər. İran mediası xalqı inandırmışdı ki, İran İsraili məhv edir. Onların sevincinə ermənilər də qoşulmuşdu. Həmin axşam Ermənistan mediası özünü İran mətbuatı kimi aparırdı. Cavabın necəliyindən asılı olmayaraq, İran gözləniləni etdi. İndi gözlər İsraildədir. İranın cavabı nə vaxt, necə veriləcək? Netanyahu əmin edir ki, cavab mütləq olacaq. İsrailə zərbənin xeyir-duasını İranın Ali lideri Xameneyi vermişdi. Onu buna SEPAH əmin etmişdi. İran güclü görünmək istəyirsə, yeganə yol İsrailə cavab verməkdir. SEPAH İran prezidentini isə saya salmamışdı. New York Times iddia edir ki, İranın İsrailə cavabından Pezeşkian xəbərsiz olub. Bu iddilar doğrudursa, deməli, SEPAH dövlət içində dövlət olduğunu bir daha göstərib. Bu isə İrandakı haçalanmanın pik həddindən xəbər verir. Pezeşkian özünü, necə deyərlər, sındırmır. Hər şeydən xəbəri var imiş kimi, Netanyahunu hədələyir. Məsud Pezeşkianın öz ölkəsinə xəbərdarlığı isə daha ciddi səslənir. İran parçalana bilər deyir. Ölkədə hansısa hadisə baş versə, Qərbi və Şərqi Azərbaycan, Kürdüstan əyalətləri və digər bölgələr müstəqil dövlət olacaq. İranda indiyədək çox hadisələr baş verib. İran xalqı bir neçə dəfə ayağa qalxıb. Cənubi azərbaycanlıların mübarizəsi bir nəticə verməyib. Amma bu, o demək deyil ki, nəticə heç vaxt olmayacaq. Pezeşkian da belə düşünür. İranın daxilində vəziyyət hələ ki, sakitdir. Amma xarici düşmənləri daxilini də hər an xaosa çevirə bilər. İsrail kəşfiyyatı SEPAH-ın içinə sıza bilibsə, deməli İranın narahatlığına dəyər. Keçmiş prezidentləri Mahmud Əhməfinejat etiraf edir. İran kəşfiyyatında İsraillə mübarizə üçün yaratdıqları bölmənin rəhbəri İsrail agenti çıxıb. Bu o deməkdir ki, İsraildə İranın bütün strateji obyektləri ilə bağlı məlumatlar ola bilər. Bu baxımdan İsrailin İrana cavabı çox ciddi ola bilər. Sabah oktyabrın 7-dir. Hər şey o gün başlamışdı. Bir il əvvəl. İran öz proksisi Həması İsrailin üstünə atanda nəticəni təxmin etməmiş deyildi. Həmas, Hizbullah, Husilər. Hər tərəfdən İsraili hədəf alan İran bu 1 ildə nəyə nail oldu? 42 mindən çox qəzzalının ölümünə. Dinc insanları öldürən İsrailin əlinə nə keçdi? 42 mindən çox qəzzalının qanı. İsrail təbii ki, Həması, Hizbullahı zəiflədə bildi, amma məhv etmək məqsədinə hələ də çata bilmir. Allahdan kömək və yaxın qələbə. Xameneyinin sitatıdır. İnanır ki, Allah İrana İsraili məğlub etməkdə kömək edəcək. Əlbəttə, Allah məzlumların ahını eşidir. İndiki durumda məzlum yalnız onlardır – hər gün Yaxın Şərqdə ölən dinc insanlar. Onların ölümünə görə günahkar isə hər ikisidir – İran da, İsrail də.
Bizi İzləyin:
Whatsapp: [ Ссылка ]
Facebook: [ Ссылка ]
Instagram: [ Ссылка ]
Teleqram: [ Ссылка ]
Sayt: [ Ссылка ]
Copyright © İCTİMAİ TV
#itv #ictimaitv #video #televiziya #baku #videolar #sondakika #video #gündem #news #sondeqiqe #sondəqiqə #gündem #news #keşfet
Ещё видео!