AsekoseNews-Բարձրագույն դատական խորհուրդը չեմ դիտարկում որպես զուտ կարգապահական պատասխանատվության ենթարկելու, պատասխանատվության մեխանիզմներ կիրառելու մարմին: Այս մասին այսօր ԱԺ-ում իր ելույթում ասաց ԲԴԽ անդամի թեկնածու Աննա Մարգարյանը։
Նա նշեց, որ խորհուրդը դիտարկում է առաջին հերթին որպես դատարանների անկախության ձեւավորմանն աջակցելու կառույց․ «ԲԴԽ-ն պարզապես դիտարկել որպես պատասխանատվության ենթարկող մարմին, նման կարծիք չունեմ ու դրա հետ համաձայն էլ չեմ լինի: Առաջին հերթին ԲԴԽ-ն պետք է լինի դատական համակարգի անկախության երաշխավորը»,- ասաց նա եւ հավելեց, որ եթե հնարավորություն ունենա ԲԴԽ-ն ներկայացնելու, ապա պետք է ուշադրություն դարձնի, թե ինչպես են վերանայվելու օրենսդրական հիմքերը. դա վերաբերում է նաեւ կարգապահական պատասխանատվության ենթարկելու հիմքերին:
«Իմ քայլը» խմբակցության պատգամավոր Սերգեյ Ատոմյանը ԲԴԽ անդամի թեկնածուին խնդրեց խոսել նաեւ անցումային արդարադատության եւ վեթինգի վերաբերյալ իր պատկերացումներից։
ԲԴԽ անդամի թեկնածու Աննա Մարգարյանն առաջարկեց հրաժարվել վեթինգ բառից․
«Իմ կողմից կլինի խնդրանք՝ ընդհանրապես հրաժարվել «վեթինգ» բառից, որովհետեւ այն ոչ միշտ է դրական պոտենցիալ պարունակում: Այստեղ խնդիրը զուտ վեթինգի հարցը չէ, մենք ունենք մի խնդիր՝ ապահովել բարեվարքություն դատական համակարգում, ապահովել արդար, անաչառ, մարդու իրավունքները հարգող եւ սեփական համոզմունքների ու իրավունքի վրա հիմնվող դատավոր: Դրանք պիտի լինեն այն չափանիշները, որոնց հետեւելու ենք, հետեւաբար ասել, որ իրականացնելու ենք վեթինգ կլասիկ իմաստով, ես ձեռնպահ կմնայի», - ԱԺ-ում ասաց Աննա Մարգարյանը:
Նա ընդգծեց, որ պետք է դատավորների մասնագիտական գործունեությանը վերաբերող հստակ պահանջներ ներկայացվեն ու միայն դրանից հետո հնարավոր կլինի խոսել դատական համակարգում բարեվարքությունն ապահովելու ճանապարհների մասին:
ԼՀԿ խմբակցության պատգամավոր Արման Բաբաջանյանն էլ, դիմելով Մարգարյանին, ասաց, որ դատավորի բարեվարքության ընդհանուր կանոններ հաստատված են, բայց ակնկալել, որ ԲԴԽ-ն իր իսկ հաստատած կանոններին կկարողանա ենթարկեցնել դատական համակարգի ներկայացուցիչներին՝ միամիտություն է։ Բաբաջանյանը թեկնածուից հետաքրքրվեց՝ ի՞նչ նոր գործիքներով պիտի օժտվի ԲԴԽ-ն, որպեսզի վեթինգի գործընթացը անցնցում լինի եւ կարեւոր տեղ ունենա բարեվարքությունը։
Աննա Մարգարյանը համաձայնեց, որ կանոնները դեռեւս արժեք չունեն, քանի դեռ մեխանիզմը չի աշխատում։ Թեկնածուն ասաց, որ լուծումներից մեկն այն է, որ ԲԴԽ-ն ինքնուրույն սկսի վարույթ անցկացնել։ Նա խոսեց նաեւ հայտարարագրերի մասին, նշելով, որ ԲԴԽ-ն նախ պետք է հստակեցնի իր լիազորությունները՝ հասկանալու համար ինչ խնդիր կա հայտարարագրերում։ Մարգարյանը նկատեց, որ եթե նույնիսկ ինչ-որ խնդիր լինի, հայտարարագիր ներկայացնողը կարող է պարզաբանում տալ, եւ արդյունքում հարցը կրկին իրավական դաշտ կմտնի։
#asekose #annamargaryan
