Լսեք թէ ինչպես է լինելու Աշխարհի Վերջում Ահեղ Դատաստանի տեսարանը: Ես ձեզ հիմա շատ կարևոր բաների մասին եմ պատմելու, և խնդրում եմ, դուք էլ պատմեք ձեր մտերիմներին, տնեցիներին ու հատկապես զավակներին: Գրեք ու կիսեք ձեր էջերին, որպեսզի ձեր օգնությամբ մեր ազգն իմանա այս գալիք բաների մասին:
Ձեզանից ովքեր որ Ավետարանը կարդում են, նկատած կլինեն, որ հաճախ Տեր Հիսուսն իր մասին խոսում է՝ օգտագործելով Մարդու Որդի բնորոշումը: Որտեղի՞ց է գալիս այս արտահայտությունը: Դանիել մարգարեյի գրքում մի հատված կա Աշխարհի Վերջի Ահեղ Դատաստանի տեսարանի մասին, որտեղ գրված է Մարդու Որդի արտահայտությունը: Ու այդ հատվածն ընթերցվում է այսօր բոլոր Հայ Առաքելական Եկեղեցիներում: Դանիել մարգարեն գրում է «Նայում էի, մինչև որ աթոռներ դրվեցին, և մի Ծերունի նստում էր այնտեղ. նրա հագուստը ձյան պես սպիտակ էր, նրա գլպի մազերը մաքուր էին գեղմի նման, նրա աթոռը՝ կրակի բոցի նման, և նրա անիվները՝ ինչպես բորբոքված կրակ: Նրա առաջից հոսում էր կրակե հորդ մի գետ, հազար-հազարավորներ պաշտում էին նրան, և բյուր-բյուրավորներ կային նրա առջև: Նա ատեան նստեց և գրքերը բացվեցին: Այն ժամանակ ես շարունակում էի նայել այն մեծամեծ խոսքերի պատճառով, որ այդ եղջյուրն էր խոսում, մինչև որ գազանը վերացավ ու կորավ, և նրա մարմինը տրվեց կրակին՝ այրվելու: Մյուս գազանների իշխանությունը վերացվեց, և կյանքի երկարության որոշակի ժամանակ տրվեց նրանց: Գիշերային տեսիլքում տեսնում էի, որ ահա, երկնքի ամպերի միջից գալիս էր մեկը մարդու Որդու նման և հասնում Ծերունուն, նա բերվեց նրա առջև: Նրան իշխանություն, պատիվ և արքայություն տրվեց. բոլոր ազգերը, ժողովուրդներն ու լեզուները պիտի ծառայեն նրան. նրա իշխանությունը հավիտենական իշխանություն է, որ չի անցնի, և նրա թագավորությունը չի կործանվի» (Դանիել 7:9-14): Նկատեցի՞ք Քրիստոսի և Հայր Աստուծո հարաբերությունը: Ասում է «երկնքի ամպերի միջից գալիս էր մեկը մարդու Որդու նման և հասնում ծերունուն»: Եվ նրան տրվում է իշխանություն, պատիվ և արքայություն բոլոր ազգերի վրա:
Սիրելի մարդիկ: Այս դատաստանից ոչ մեկը չի կարողանալու խուսափել: Ու՞ր փախնես: Շատերը Քրիստոնեություն են ուզում առանց Տեր Հիսուս Քրիստոսի: Բայց լսեք Աստուծո Խոսքը: Ուշադիր լսեք, Տեր Հիսուս Քրիստոսի ձեռքում է մեր կյանքի շունչը, և Ինքն է մեր փրկիչը, հատուցողն ու դատավորը: Մի պնդացրեք ձեր սրտերը: Այլ հենց այսօր բացեք ձեր Աստվածաշունչն ու սկսեք կարդալ 4 Ավետարանները, որպեսզի սկսեք ճանաչել Աստծուն: Հետո կորոշեք, հետևել իրեն թէ՞ ոչ: Եթե Աստվածաշունչը չկարդաք, ձեր կրոնը կլինի կեղծ ու հնարովի: Դուք կլինեք նման այն մարդուն, ով իր տունը տարինեով կառուցում է, բայց երբեք տանիքին չի հասնում: Նա շուտ կկորցնի իր ապագան ու կկտրի իր հույսը: Կարդացեք Ավետարանը և սկսեք ապաշխարության կյանք ապրել: Գալիք Ավագ Շաբաթն ավելի իմաստալից կլինի ձեր համար: Ձեր կյանքն ամբողջովին կփոխվի:
