Екі ай бұрын бауыр еті баласын, ал бірнеше күн бұрын туған інісін жер қойнына тапсырған Қаржаубай Нұрымов 15 тәулікке қамауға алынды. Құзырлы орган әкімшілік жауапқа тартып отыр. Қайғыдан қан жұтқан азамат кеше әділ сотты талап етіп, жүк көлігінің үстіне шығып, машиналардың қозғалысына кедергі жасаған-мыс. Бұл әрекетке Қаржаубай Нұрымовтың туыстары да қатысқан көрінеді. 9 желтоқсанда денесі табылған Нұрқанат Ғайыпбаевты сот-медициналық экспертизасы суицид жасады деп таныды. Баласынан кейін араға аз уақыт салып екінші отбасы мүшесін жерлеген Қаржаубай Нұрымов бауырының өзін-өзі өлтіргеніне күмәнмен қарайды.
