Бұл жолғы сайлау ерекше дауыс берушілермен де есте қалатын сияқты. Мысалы, Талдықорғанда тұрғындар сайлау учаскесіне түйемен келіп, көпшілікті таң-тамаша етті. Қазақша шапан киіп, қос өркешті жануарға мініп, өз таңдауларын жасағандар - түйе асыраушылар екен. Ал Қарағанды қаласындағы көше тазалаушылар сайлау учаскелеріне қолдарына сыпырғы, күрегін ұстап, камазбен келген. Сонымен осы саяси додада ерекшеленіп, елдің есінде қалғысы келген дауыс берушілер жайлы әр аймақтағы әріптестеріміз айтсын.
Абай облысының сайлау учаскелерінде сайлаушыларды шашу шашып, әсем әнмен күтіп алды. Бауырсақ үлестріліпі, Наурыз көже таратылды. Сондай-ақ, жәрмеңкелер мен спорттық жарыстар да өтті. Ал ақ шапан киіп, Қыдыр ата кейпіне енген тұрғын учаскелерге барып, бата беріп, халыққа сәттілік тіледі.
ҚАЙРАТ САДУ, Тұрғын:
– Бұған енді Қазақстанымыздың болашағы үшін беріп жатқан дауыстары бәрі оң болсын деп ойлаймын. Еліміздің ертеңі үшін, бүгінгі келіп жатқан дауыс берушілерге ақ жол тілеймін, сәттілік тілеймін. Қазақстаным гүлдене берсін! Әумин!
Ал қызылордалықтар дауыс беруге көршілерімен бірге топтасып келді. Мысалы, қаладағы Қазақстан көшесінің тұрғындары қазақтың ұлттық киімдерін киіп шыққан. Ерлер жағы қазақы нақыштағы шапан, бөрік, ал әйелдер оюлы қамзолдарымен келген екен. Осылайша бір көшенің тұрғындары бір ауыздан бірігіп, өздері тіркелген сайлау учаскесінде таңдауларын жасады.
МАХАББАТ НҰРЖАНҚЫЗЫ, Тілші:
– Маңғыстау облысының да ішімдіктен бас тартқан Баянды ауылының тұрғындары сайлау учаскелеріне ұлттық киіммен барды. Бұл идеяны елдімекеннің үлкендері көтеріп, жастары қолдаған. 8 мыңнан астам тұрғыны бар ауылдың ішінде 4 мыңнан астам сайлаушы тіркелген. Олар бұл сайлауға белсенді қатысып, учаскелерге мерекелік көңіл-күймен келді.
ҚАРАШАШ ЖҰМАЖАНОВА, Тұрғын:
– Қазір Амал мерекесі болды. Біз сол мерекеден бері мектепте осылай киініп жүрміз. + Сайлауға да осылай киініп келдік. Өзім жөн көрдім, себебі өзіміздің ұлттық нақыштағы киімдердерімізді осындай жерде көрсетуіміз керек.
Жаңаөзендегі учаскелерде саяси науқан тіпті қызықты өтіп жатыр. Тек ересектерге ғана емес, мұндай науқанның жасөспірімдерге де маңыздылығын түсіндіру үшін Сайлау учаскелері орналасқан ғимарат маңында балалар арасында ұлттық спорт түрлерінен жарыс ұйымдастырылды. Балалар асық атып, арқан тартып, қол күрестен бақ сынады.
РУСЛАН ЖАСҰЛАНҰЛЫ, Тілші:
– Ал Петропавлдық такси жүргізушісі сайлау күні ерекше акцияны қолға алды. Ниязбек Есқақов дауыс беруге келген тұрғындарды күні бойы сайлау учаскесіне тегін жеткізді. Көбіне көлігіне зейнеткерлер мен ардагерлерді, көмекке мұқтаж адамдарды отырғызған.
НИЯЗБЕК ЕСҚАҚОВ, такси жүргізушісі:
– Бұл менің өз бастамам. Ол үшін ешкімнен ақша да алмаймын. Мені ешкім қаржыландырып та жатқан жоқ. Тұрғындарға сайлау күні жақсы көңіл-күй сыйлағым келді.
Ниязбек Есқақов акцияны күні бойы яғни, сайлау учаскелері толық жабылғанға дейін жалғастырды. Ол осы уақытқа дейін 30-ға жуық адамды дауыс беру учаскелеріне жеткізген екен.
ДИАНА САПАРҚЫЗЫ, Тілші:
– Қарағандыда коммуналды қызмет жұмысшылары да сайлауға белсене ат салысты. Олар сайлау учаскелеріне тіпті камазбен келіп, ғимарат ішіне күрек-сыпырғыштарын алып кірді. Қаланың тазалығына жауапты жұмысшылар жаңа сайланатын депутаттардан халықтың құқығын қорғайтын заңдарды күтетінін жеткізді. Қыстың қақаған аязы мен күннің аптап ыстығына қарамастан, 25 жылдан бері Қарағандыны тазалап жүрген Александр Тюшаевтің бұл сайлаудан үміті зор екенін айтты.
АЛЕКСАНДР ТЮШАЕВ, Көше тазалаушы:
– Мен дауысымды елдің болашағы үшін бердім. Келешек депутаттар халық үшін жемісті жұмыс істесе екен деймін. Адам құқын қорғайтын заңдар жаңартылса деймін. Себебі халық биліктің қайнар көзі.
Жетісу облысының орталығы Талдықорған қаласында да сайлау ерекше өтті. 35 жастағы түйеші Ұлан Байзақов бастаған ойсыл қара өсірушілер сайлау учаскелеріне түйемен келді. Олар Ұлыстың ұлы күні келе жатқанын, Күн мен Түн теңесетінін тұрғындарға паш етіп, қолындағы саз аспаптарының сүйемелдеуімен ән шырқап, халықтың көңіл-күйін көтерді.
Бізді әлеуметтік желіде оқыңыздар:
Youtube -[ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
WhatsApp Информбюро +7 777 331 31 31
#News #Kazakhstan #Жаңалықтар #Біздіңжаңалықтар #Нашиновости #Сегодня #Қазақстан #31канал
