AsekoseNews-Ամենաբարդ խնդիրներից մեկը, որ ծառացած է մեր կառավարության առաջ, Ամուլսարի հանքավայրի խնդիրն է:
Այս մասին Ջերմուկում քարոզարշավի ժամանակ հայտարարել է վարչապետի պաշտոնակատար, «Իմ քայլը» դաշինքի առաջնորդ Նիկոլ Փաշինյանը:
«Հարցերի հարցն այն է, թե արդյոք Ամուլսարի հանքի շահագործումը սպառնալիք կրում է Ջերմուկի ջրային համակարգի և Սևանա լճի համար»,- ասել է Փաշինյանն ու հիշեցրել է , որ գործով ՔԿ-ում հարուցված քրեական գործ կա, որի շրջանակներում փորձաքննություն է նշանակված:
«Մենք միջազգային մրցույթ ենք հայտարարելու և բյուջեից գումար չենք խնայելու, որ համաշխարհային բարձր մակարդակի ընկերություններից մեկը վստահելի փորձաքննություն անցկացնի: Մենք չունենք որևէ անձնական բնույթի շահագրգռություն հարցի լուծման տարբերակների հետ կապված: Երբ փորձաքննության արդյունքները լինեն, մենք դրանք առաջին հերթին կքննարկենք համայնքների բնակիչների հետ»,- ասել է Նիկոլ Փաշինյանն ու նշել, որ ՀՀ կառավարությունը գումար չի խնայելու, որ փորձաքննությունն անցնի ամենաբարձր մակարդակով:
«Այս խնդրի շուրջ ճգնաժամը որոշակիորեն նեգատիվ ազդեցություն է ունենում ներդրումային միջավայրի վրա, բայց կարծում եմ, որ մենք բոլորս մեր դիրքորոշումների հստակությամբ այդ ազդեցությունը հաղթահարում ենք»,- շեշտել է վարչապետի պաշտոնակատարը:
Ջերմուկում Նիկոլ Փաշինյանի ելույթն ամբողջությամբ՝ տեսանյութում
