[ Ссылка ]
Հայաստանը դատապարտում է Սիրիայի հյուսիս-արևելքում Թուրքիայի կողմից իրականացվող ռազմական ներխուժումը։ Վարչապետ Նիկոլ Փաշինյանն այսօր կառավարության նիստի ժամանակ գործողությունն ապօրինի որակեց, միջազգային հանրությանը կոչ արեց գործուն միջոցներ ձեռնարկել այդ գործողությունը դադարեցնելու և Թուրքիայի սահմանի երկայնքով Սիրիայի քաղաքացիներին, այդ թվում՝ ազգային փոքրամասնություններին և նրանց իրավունքները պաշտպանելու ուղղությամբ։
«Մենք մտահոգված ենք իրավիճակով, որովհետև, մեր գնահատմամբ, այդ գործողությունը ավելի կխորացնի Սիրիայում հաստատված մարդասիրական ճգնաժամը», - նշեց վարչապետը։
Սիրիա Թուրքիայի ռազմական ներխուժումը դատապարտող հայտարարությամբ ավելի վաղ հանդես է եկել Հայաստանի արտգործնախարարությունը:
Հատկապես մտահոգիչ իրավիճակ է ստեղծվում ազգային և կրոնական փոքրամասնությունների համար, հայտարարել էին Արտգործնախարարությունից՝ կոչ անելով գործադրել գործուն միջազգային ջանքեր այս ռազմական ներխուժումը դադարեցնելու, զանգվածային վայրագությունները կանխելու և Թուրքիային սահմանակից Սիրիայի բնակչությանը պաշտպանելու ուղղությամբ։
Արտգործնախարարաության հայտարարության մեջ նաև շեշտվել է՝ Հայաստանն աջակցում է Սիրիայի միասնությանը և ինքնիշխանությանը։
Թուրքիայի հյուսիսարևելյան շրջանում բնակվող հայ համայնքը Թուրքիայի ռազմական գործողություններից չի տուժել, «Ազատությանը» փոխանցեց Հայաստանի արտգործնախարարության Միջին Արևելքի և Աֆրիկայի վարչության պետ Արմեն Մելքոնյանը։
Թուրքական ներխուժման գլխավոր թիրախներից մեկը հանդիսացող Թել Աբյադ բնակավայրում ապրող 16 հայկական ընտանիքներից 13-ը, ըստ Մելքոնյանի, ինքնակամ հեռացել են և ցամաքային ճանապարհով տեղափոխվում են դեպի Հասակե քաղաք:
«Բոլոր դեպքերում դեսպանությունը կամ որևէ մեկը չի կարող մտնել այդ շրջանները, էդ հնարավորությունը չկա։ 13-ը դուրս է եկել, ապահով հասել են Հասակե, 3-ը ուղղակի ցանկություն չեն ունեցել դուրս գալու։ Տուժածներ չկան, փառք Աստծո, մենք մշտական կապի մեջ ենք և պատրաստ ենք ցանկացած զարգացումների», - նշեց Մելքոնյանը։
ԱԳՆ ներկայացուցչի խոսքով, հայերը Սիրիայի հյուսիսարևելյան շրջանում հիմնականում բնակվում են Կամիշլի քաղաքում, որտեղ այս պահին կա 400-420 ընտանիք, կամ մոտ 3 հազար հայ: Հայաստանցի դիվանագետի խոսքով՝ Սիրիայում Հայաստանի դեսպանությունը «մշտական կապի մեջ է համայնքի ղեկավարության հետ, և նրանք այս պահին տարհանման ցանկություն չունեն, քանի որ այդպիսի վտանգ դեռևս չեն զգում»:
«Կամիշլին երեկ մեկ անգամ ենթարկվել էր հրթիռակոծության, բայց Կամիշլիի հիմնական մասը գտնվում է Սիրիայի իշխանությունների հսկողության ներքո, այնպես որ, չեմ կարծում, որ թուրքական ներխուժումը հասնի մինչև սիրիական իշխանությունների տիրապետության տակ գտնվող շրջանների հետ ընդհարման», - նշեց Մելքոնյանը՝ շարունակելով․ - «Դեսպանությունը մշտական կապի մեջ է համայնքի ղեկավարության հետ, այս պահին տարհանման ցանկություն չունեն, քանի որ այդպիսի վտանգ դեռևս չեն զգում, իհարկե, նաև պատրաստ են ցանկացած զարգացման, և եթե այդպիսի իրավիճակ առաջանա, որ անհրաժեշտ լինի տարհանում, ապա դա իհարկե կկատարվի՝ նաև համագործակցաբար Հալեպի և Դամասկոսի ազգային իշխանությունների հետ»:
Ազգային ժողովի ընդդիմադիր «Լուսավոր Հայաստան» խմբակցության ղեկավար Էդմոն Մարուքյանը կարծում է՝ նաև Սիրիայի օրինակով պետք է տեսնել, թե ինչ երկիր է Թուրքիան, և լինել իրողություններին ադեկվատ։
«Թուրքիան հիմա մեզ վրա չի հարձակվում, հարձակվել է Սիրիայի վրա, բայց Թուրքիան մեր հարևանն է, և սրանք օրինակներ են, որ մեր Ազգային անվտանգության խորհրդում նստած մարդիկ դոկտրինի վրա են աշխատում, և մենք հանդիպում ենք ունեցել Անվտանգության խորհրդի քարտուղարի հետ և ես սրա մասին խոսել եմ, որ պետք է սցենարներ մշակվեն հնարավոր սպառնալիքների հետ կապված», - նշեց Մարուքյանը։
Ի դեպ, վարչապետ Փաշինյանը կառավարության նիստում կարծիք հայտնեց, որ իմաստ ունի նիստից հետո դռնփակ ռեժիմով քննարկել Սիրիայի հյուսիսիում ստեղծված իրավիճակի հնարավոր զարգացումները։
Մեր ուղիղ հեռարձակումները դիտեք այստեղ՝ [ Ссылка ]
«Ազատությունը» սոցիալական մեդիայում
Facebook - [ Ссылка ]
Twitter - [ Ссылка ]
Instagram - [ Ссылка ]
VKontakte - [ Ссылка ]
Odnoklassniki - [ Ссылка ]
