İran artıq həftələrdir davam edən daxili iğtişaşları yatırmaq, narazı millətinin dərdini dinləyib razı salmaq yerinə məsuliyyəti öz üzərindən kənarlaşdırır, sərhəddində öz müstəqilliyi üçün “təhlükəli” vəziyyət axtarır. 16 oktyabr 2022-ci il tarixində SEPAH-ın quru qoşunlarının koordinasiya mərkəzinin müdir müavini Əliəkbər Purcəmşidian SEPAH-ın "Aşura" qanadının komandirləri ilə görüşündə İran silahı qüvvələrinin Araz bölgəsində təlim keçirəcəyini bildirdi. Maraqlıdır etirazların hələ də davam etdiyi, vəziyyətin günü-gündən daha da təhlükəli hal aldığı bir zamanda İranı Ərdəbil və Şərqi Azərbaycan vilayətlərində böyükmiqyaslı təlim keçirməyə vadar edən nədir? SEPAH-ın Quru Qoşunlarının bacarıqlarının nümayiş etdirilməsi məqsədilə hərbi təlimlərinin əsas mərhələsi “Qüdrətli İran” şüarı ilə 17 oktyabr tarixində başlandı. Deyəsən İran qüdrətini öz millətinə qarşı qeyri-insani hərəkətlər törətməkdə, hər cür kobud davranışlar nümayiş etdirməkdə, qonşu dövlətlərə isə güc nümayiş etdirməkdə görür. SEPAH rəsmisi Əliəkbər Purcəmşidian çıxışında bildirib ki: “Sionist rejimin bölgədə olması ciddi təhlükədir. Region dövlətlərinin silahlı qüvvələri ilə hər hansı yaxın əməkdaşlıq olarsa, bu region diplomatiyası və təhlükəsizliyi üçün yeni çağırışlar yarada bilər. Buna əhəmiyyətsiz yanaşmaq olmaz".
İran artıq dəfələrlə öz sərhədləri yaxınlığında sionist rejimin mövcudluğuna dözməyəcəyi ilə bağlı təhdid dolu bəyanatlarını səsləndirib. Maraqlıdır ki, Prezidentin onların bu iftirasına qarşı əsaslı cavabından sonra da İran yenə bu sərsəm iddianı saxlamaqda davam edir. Vətən müharibəsi ərəfəsində İrandan fərqli olaraq İsrail Azərbaycanı açıq şəkildə dəstəklədi. Bunun əksinə olaraq cənub qonşumuz və din “qardaşımız” hesab olunan İran illərdir Ermənistan üçün nəfəslik rolunu oynayıb, Azərbaycan torpaqlarının işğal altında olduğu dönəmdə işğalçı ölkəni hər şeylə, eləcə də hərbi təyinatlı materiallarla təchiz edib və indi də bu fəaliyyətinə davam edir. Hətta İran və Ermənistan dəfələrlə çəkinmədən Azərbaycan-Türkiyə əlaqələrinin devizi olan "bir millət, iki dövlət" ifadəsini erməni və fars xalqlarına münasibətdə istifadə edərək - "ermənilərlə farslar bir millət, iki dövlətdir"- deyə bəyan etmişlər.
Müsəlman həmrəyliyindən ağız dolusu danışan İran nədənsə öz qonşuluğundakı Qarabağ münaqişəsi ilə bağlı nə müsəlman həmrəyliyi, nə də şiə təəssübkeşliyinə sadiq qalmadı. Bir dəfə olsun haqq səsimizi müdafiə etmədi, işğalın sonlandırılması üçün hansısa bir fəaliyyətə cəhd etmədi.
İki ilə yaxındır ki, Zəngəzur dəhlizi ətrafında gedən müzakirələr İranı ciddi narahat edir. Açıq şəkildə bəyan etməsə də İran dəhlizin reallaşmasının əleyhinədir və hər cür maneə yaratmağa çalışır. İran rəsmilərinin, mütəxəssilərinin fikrincə, bu dəhliz Zəngəzur vilayətini Ermənistandan ayırmaqla Ermənistanı tarixən nəfəslik rolu oynayan İran yolundan məhrum edir və həmin yolun “qorunması” vacibdir.
Bu təlimlər Ermənistanla sərhədi niyə əhatə etmir?! Niyə torpaqlarımızın işğal altında olduğu dövrlərdə bu təlimlər keçirilmədi? Onda İran sərhədində qanunsuz terorçu dəstələr fəaliyyət göstərirdi və bu İran üçün təhlükəli deyildimi?! Biz qonşu dövlətlərlə ərazi bütövlüyünə hörmət, mehriban münasibətlərin bərqərar olmasını istəyirik. Daim İrana da bu prinsipdən yanaşmış, səmimi münasibət bəsləmişik, ancaq İrandan heç vaxt səmimi münasibət görməmişik. İran Azərbaycanla sərhədlərdə əzələ nümayiş etdirməklə onsuz da heç bir şeyə nail ola bilməyəcək. İranın Azərbaycan sərhədlərində hərbi təlim keçirməsi belə düşünməyə əsas verir ki, bu qeyri-dost addımdır və burada heç bir xoş niyyətdən söhbət gedə bilməz.
