Tema : Upaya pelestarian kesenian wayang golek melalui media sosial.
SINOPSIS DEWA BAJINGAKERI
Sinigeug, di Karaton Nagara Astina, Prabu Suyudana ngondang Prabu Baladéwa ti Mandura, Resi Kombayana, Adipati Karna, ogé dulur-dulurna Kurawa. Prabu Suyudana téh ménta kamandang ti nu haladir kumaha narékahanana sabada ngimpi kadatangan déwa nu maréntahkeun ménta baju Kréy Antakusumah nu dipaké ku Gatotkaca pikeun tumbal kawah Candradimuka di Sawarga Maniloka nu ngagolak. Prabu Baladéwa jeung Adipati Karna teu satuju mun ménta baju Antakusumah ti Gatotkaca. Sabab sarua waé bakal nimbulkeun masalah nu leuwih beurat antara Pandawa jeung Kurawa. Ogé mun baju Antakusumah dicoplokkeun tina awak Gatotkaca sarua jeung maéhan Gatotkaca. Tapi dina hal ieu, Resi Kombayana atawa Dorna sanggup nedunan paménta ti déwa ngaliwatan ngimpi raja.
Di tempat séjén, nyaéta di tempat panganjrekan Gatotkaca, kadatangan amangna, Purbakésa, titahan lanceukna Déwi Arimbi atawa indungna Gatotkaca. Déwi Arimbi ngimpi yén anakna téh tilelep. Sarua pisan jeung ngimpina Semar Badranaya. Sabot keur ngobrol jeung amanna, torojol rombongan ti Kurawa nu dipingpin ku Dorna. Intina ménta atawa nginjeum baju Antakusumah. Tapi ku Gatotkaca teu dibikeun. Antukna Gatotkaca dirempug ku wadyabalad Kurawa. Ngan kabéh ge teu aya nu manggapulia ngayonan Gatotkaca. Dorna ahirna minangsaraya ka Arjuna di Madukara. Teu lila jebul rombongan siluman ti Sétragandamayit nu dipingpin ku Gedéng Permoni. Nu maksudna sarua jeung urang Astina. Tapi tetep rombongan Gedéng Permoni teu walakaya nyanghareupan kasaktian Gatotkaca.
Gatotkaca teu walakaya waktu Arjuna dibarengan ku Dorna ménta deui baju Antakusumah. Sabab Arjuna boga pakarang nu jadi antina Antakusumah, nyaéta keris Pancaroba. Dina jarak saméter waé ti keris Pancaroba, baju Antakusumah bakal coplok.
Carios salajengna ... mangga bandungan dugi ka réngsé. Cag!
