Meteorologu i njohur grek, Sakis Arnaoutoglou, që ndjek me vëmendje dhe përkushtim edhe motin në Shqipëri e rajon, parashikon një përkeqësim të ri të kohës ditën e premte dhe kryesisht të shtunën në një pjesë të madhe të vendit, në zonat qendrore fillimisht, por më pas me reshje të dendura shiu dhe stuhi të fuqishme në ato veriperëndimore dhe veriore.
“Zonat në perëndim të Gadishullit të Ballkanit pritet të pranojnë shumë reshje shiu, veçanërisht disa qytete e fshatra në Mal të Zi dhe në Shqipëri, nuk përjashtohet që të përballen me probleme për shkak të këtyre reshjeve të dendura në 24 deri në 48 orët e ardhshme”,-tha Sakis Arnaoutoglou, sinoptikan ERT.
I pyetur nga TCH, ai ka shpjeguar përsëri se në epiqendër të kësaj vale disa orëshe të motit të keq do të jenë përsëri ato zona që u prekën edhe javën e kaluar dhe se reshjet e dendura të shiut do të regjistrohen përsëri në Shkodër, Kukës, Lezhë e zona të tjera veriore dhe veriperëndimore në kufi me Malin e Zi, ku mund të shkaktojnë edhe njëherë përmbytje.
“Shikoni këtu edhe nuancat më të errëta në rajonet e Ballkanit Perëndimor nga Shqipëria në Mal të Zi, nuk përjashtohet që siç ju thashë në fillim, fenomenet kohore të kenë një karakter intensiv dhe të krijojnë probleme atje, nga e premtja në mëngjes deri në mesditën e së shtunës,”- tha ai.
