"Барахолкадан" тағы да өрт шықты. Бұл жолы басынан бұлт кетпей қойған базардың "Юпитер" бөлігі қызыл жалынға оранды. Өрт сөндіру қызметі жанған жер - 400 шаршы метрді құрады дегенмен, бүкіл "Барахолка" саудагерлері түнімен базар жағалап жүрді. Тіпті, олардың саны құтқару қызметкерлерінен көп. Өйткені, басқа базарлардағы өрт дерегінен секем алған саудагерлер, базар маңын өрт сөнгенше, торуылдап, кетпей қойды.
Тіпті, олардың көптігі соншалық, қалың нөпірді қаланың күллі күштік құрылымдары арнайы шеп құрып, базар маңайынан аластатып тұрды. Саудагерлердің айтуынша, "Юпитер" базарының алғашқы екі қатарында азық-түлік сатылады екен. Үшінші қатарынан бастап, былғары тондар саудаланады. Қомақты қаражатын тауарына салып қойған, соңғы қатардың саудагерлері, осы түні жандарын шүберекке түйіп жүрді. Тіпті, құтқарушылардың "өрт сөндірілді" деген хабарынан да саудагерлер секем алып, алғашқыда сене қоймады.
БАУБЕК ОРАЗБАЕВ, "Юпитер" базарының саудагері:
Мынандай ауа райында өрт болуы мүмкін емес. Біреу қасақана істеді оны. Мына жерде екі ряд өртенді деп айтып жатыр, біздерді шуба сататындарға жібермей жатыр.
