Маңғыстау облысында жалақы көтеруді талап етіп, ереуілге шыққаны үшін жұмыстан босатылған жедел жәрдем қызметкерлері сот шешімімен келіспейді. Олар сот ешқайсымызды шақырмастан, сырттай шешім қабылдады деп отыр. Ал әріптестерін қолдаған Мұнайлы ауданы мен Жаңаөзен қаласы станциясының бригадалары, "басшылық жұмыстан шығарылғандарды қайта қабылдамаса, қызметке кіріспейміз" деп талап қойған. Күні кеше жиырмаға жуық жедел жәрдем қызметкерін директор жұмыстан босатқан еді. Өйткені, сот олардың ереуілін заңсыз деп бағалаған.
Сот шешімімен келіспеген Мұнайлы ауданындағы жедел жәрдем қызметкерлері бүгін тағы ереуілде тұр. Олардың айтуынша, наразылыққа қатысқаны үшін бұл станциядағы сегіз қызметкер жұмыстан босатылған. Бірақ ешқайсысы да директордың бұл шешімімен келіспейді. Бірнеше маман «адал еңбегіміздің әділ ақысын сұрағанымыз үшін неге жұмыссыз қалуымыз керек?» дейді. Алты күннен бері үйіне бармай, осында түнеген қызметкерлер талаптарымыз орындалмаса жұмысқа кіріспейміз деп отыр.
ҚАЛБАЙ АСАНОВ, Жедел жәрдем жүргізушісі:
– Кадр бөлімінен келіп қорқытады, фельдшерлердің старшийы келіп қорқытады, милициялар келіп біздің жан-жағымызда қарап тұр. Біздің құқығымызды қорғайтын адам бар ма екен?
АСЫЛБЕК АДИСОВ, Жедел жәрдем жүргізушісі:
– Соттың шешімі шықты деп мені жұмыстан шығарып отыр. Жалақымыз аз. Айлығымыз шайлығымызға жетпейді. Кредит бар. Кеше сентябрьде сабаққа зат алу мүмкін емес. Қарыз алдық әркімнен.
Сондай-ақ жұмыстан шығып қалған азаматтар осы уақытқа дейін бір де бір рет сотқа шақырылмағанадарын айтады. Әрі ереуілге барлық құрам шықса да, тек жиырмаға жуық адамның жұмыстан қуылғанына аң-таң. Ал, Ақтау қалалық №2 сотының өкілдері «ереуілге шыққандар жұмысты жалғастыруы керек еді» дейді. Өйткені Еңбек кодексінің талаптарына сай жедел және кезек күттірмейтін медициналық көмек көрсету станцияларындағы кез келген наразылық шарасы заңға қайшы екен.
РАҚЫМЖАН БЕЙСЕНОВ, Ақтау қалалық №2 сотының төрағасы:
– Ереуілді жалғастыру - ол заңсыз. Сондықтан жұмыста болмаған болса, бұлар еңбек тәртібін бұзған болып, жұмыс берушінің толықтай жұмыс берушімен еңбек шартын бұзуға негіз бола алады.
Облыстық жедел жәрдем станциясының басшысымен тілдесу мүмкін болмады. Ал, Денсаулық сақтау басқармасының басшысы телефон арқылы ереуілде белсенділік танытқан қызметкерлер ғана жұмыстан босатылғанын айтты. Айта кетейік, өткен жексенбіде жедел жәрдем қызметінің фельдшерлері мен көлік жүргізушілері жалақыны өсіруді және үстеме ақыны қайта беруді талап етіп жұмыстарын тоқтатқан болатын. Содан кейін өңірде алғашқы медициналық көмек көрсетуге жеке медицина ұйымдарының техникалары қолданылған еді.
Махаббат Нұржанқызы, Фархад Шадкам



Бізді әлеуметтік желіде оқыңыздар:
Youtube -[ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
WhatsApp Информбюро +7 777 331 31 31

свернуть