Ақтөбеде жаңа оқу жылынан бастап жұмыссыз қаламыз ба деп алаңдаған байланыс және электротехника колледжінің оқытушылары бүгін бас көтерді. Сөздерінше облыстық білім басқармасы бес мамандық бойынша орташа білім беретін орынды қыркүйектен бастап теміржол колледжінің құрамына қосқалы жатыр. Жиналғандар егер екі колледж бірігетін болса онда 100- ге жуық ұстаз жұмыссыз қала ма деп қорқады.
Жаңа оқу жылынан бастап байланыс және электротехника колледжі теміржол мамандықтары бойынша кадрлар даярлайтын басқа оқу орнының құрамына кіреді дегенді естіген оқытушылар мен студенттердің ата-аналарынан маза кеткен. Олар мүлдем басқа профильдегі мамандарды дайындайтын екі түрлі колледжді қосуға шешім шығарған жауаптылардың әрекетін түсінбей дал.
ҚАРЛЫҒАШ ЕЛЕУСІНОВА, ата-ана:
– Екі колледж қосылса мен білім сапасы төмендеп кетеді деп ойлаймын. Саны бар да сапасы жоқ болады. Ол колледжде тек қана шойын жол бағытына керек мамандықтарды дайындайды. Оператор, диспетчер сондай. Ал мынау әлеуметтік, былайша айтқанда азаматтық елдімекендердің байланысын қамтамасыз ететін маман иелерін дайындайды.
Тосыннан түскен жаңалық байланыс колледжінің қызметкерлерін де алаңдатып қойған. Сөздерінше білім басқармасы екі оқу орнының бірігетіндігі туралы шешімді демалысқа бір күн қалғанда ғана хабарлапты. Енді 100-ге жуық маман қыркүйектен бастап жұмыссыз қалудан қорқып отыр.
ЖЕҢІСБЕК БАҒЫМБАЕВ, Байланыс және электротехника колледжі кадр бөлімінің меңгерушісі:
– Кейбір оқытушылар мен қызметкерлер тарапынан жұмыссыз қалу деректері орын алып отыр. Барлығын толық нақты түрде жұмыспен қамту туралы мәселе қозғалып отырған жоқ. Облыстық білім басқармасы нақты жауап бере алмай отыр. Білім басқармасы 30-шы маусым күні хабарлады. 1-ші шілде бүкіл составтың бәрі отпускаға кетті. Сол уақытта ғана хабарланды. Оған дейін ешкім ештеңе білген жоқ.
Алайда облыстық білім басқармасындағылар колледждердің бірігуі мәжбүрлі шешім болды дегенді айтады. Себебі соңғы үш жылдың талдауы бойынша екі оқу орнында да түсетін студенттердің саны азайған. Шенеуніктер байланыс колледжінің оқытушылары бұрынғы шарттарында қалады, ал студенттері оқуды әрі қарай жалғастыра береді деп сендіріп отыр. Тек ғимарат қана өзгереді екен.
ДИНА ЖАМАНБАЕВА, Ақтөбе облыстық білім басқармасы басшысының орынбасары:
– Екі білім беру ұйымы қосылған жағдайда ештеңе өзгермейді. Мұғалімдердің сағат саны сақталады. Яғни жүктемесі толығымен сақталады. Себебі екі колледжде де мамандықтар сақталады сол күйінде. Бұл екі колледждің де бұған дейінгі континеттері, баға саны, дайындалып жатқан мамандықтарының бәрі қалады. Сол себепті ешқандай қысқарту болмайды.
Осылайша жауаптылар екі оқу орнының бірігуі керісінше, материалдық-техникалық базаны нығайтуға мүмкіндік береді деп отыр. Жаңа оқу жылынан бастап біріккен колледждердің атауы да өзгеруі мүмкін.
Жанар Қожанова, Жомарт Құдайбергенов
Бізді әлеуметтік желіде оқыңыздар:
Youtube -[ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
WhatsApp Информбюро +7 777 331 31 31
#наразылықтар #Ақтөбе
