Бір жыл бұрын сыныптасы қалам лақтырып, көзі көрмей қалған оқушының ата-анасы әділдік іздейді. Ашынған әке "сау баламды соқыр еткендерге" тым жеңіл жаза берілді деп отыр. Сөзінше, сабақ кезінде балаға тікелей жауапты тұлғалар жай ғана сөгіспен құтылған. Сөйтіп, істі жабу үшін емге деп азын-аулақ ақша жинап беріпті. Биыл да тарыққанға тон үстіне бидай шашқандай жеті жүз мың теңге ұсынды дейді жәбірленуші. Ал қаржы еш жазығы жоқ мұғалімдерден жиналғанын естіп, көмектен үзілді-кесілді бас тартыпты. Серік Әкімбаев бала қауіпсіздігіне салғырт қараған директор жұмыстан қуылсын деген талап қойды.
11 жастағы Еркеғали - Серік Әкімбаевтың тұла бойы тұңғышы. Сөзінше, бір жарым жылдан бері ұлының сол көзі көрмейді. Өйткені өткен жылы сабақ үстінде сыныптасы Еркеғалиға қалам лақтырып, көзі ағып кеткен. Содан бері төрт мәрте ота жасатыпты. Бүгін баласы бесінші рет ауруханаға жатқызылып отыр. Бірақ дәрігерлер үміттен күдік басым екенін айтыпты. Себебі көзі жүз пайыз көріп кететініне кепіл жоқ.
СЕРІК ӘКІМБАЕВ, жәбірленушінің әкесі:
– Биыл бала демалыссыз үш ай болды каждый аурухананың баспалдағын тоздыруда. Енді бізге Петербург қаласына жолдама беріп отыр. Катон-Қарағайдан біздің шығыстың Петербурға баламыз екеуміз барып қайтқанымызды есептегенде 2 млн 300 мың теңге ақша керек екен. Ал отасы қайда, жатар орны қайда, оның аудармашысы қайда?
Ал кезінде кешірім алу үшін керекті көмекті көрсетеміз деп көл-көсір уәде берген тарап ізім-ғайым жоқ дейді ашынған әке. Сосын шенеуніктерден «Қазақстан халқына» қорынан қаржы алуға жәрдемдесуді өтініпті. Өйткені отаға қажетті қаржыны тек осы ұйым ғана бере алады. Мектеп директоры болса мұғалімдерден жеті жүз мың ақша жинап әкепті. Алайда одан бас тартуға мәжбүр болған.
СЕРІК ӘКІМБАЕВ, жәбірленушінің әкесі
– Бірінші қыркүйек келеді мен екі баламды ол мектепке жіберуден бас тартамын. Қорқамын жіберуге. Айдың күнінің аманында мысалы таңғы сағат жетіде баламды мектепке жіберемін. Ал ол келеді түскі сағат обедте келіп ап көзі қантала болып келеді мысалы. Оны қалай? Баяғыда біз оқып жүргенде біз 26 бала оқыдық. Ал қазір айналдырған он балаға ие бола алмайтын мұғалімнің керегі не?
Әкімдік өкілдері барлық жауаптылар заң аясында лайықты жазасын алды деді. Яғни, сынып жетекшісі мен директорға сөгіс берілген. Қосымша әкімшілік айыппұл салыныпты. Айтуынша, жазатайым жағдай болғандықтан мектеп қызметкерлерінің кінәсі жоқ. Ал жеті жүз мың теңгені мұғалімдерден өз еріктерімен жинады дейді.
ӘСЕМ НҮСКЕНОВА, ШҚО Білім басқармасының бөлім басшысы
– Сол балаға кім аямайды көмек бергісі келеді өз еркімен көмек ретінде ақша өткізген. Аудандық білім бөліміне. 700 мың теңге көлемінде қаражат жиналып, Ата-анасы өздері қабылдамады.
Шенеуніктер Әкімбаевтарға көмек көрсетілгенін және қажетінше қолдауға дайын екендерін жеткізді. Яғни, бұған дейін де отаға жолдама беріп келген. Бірақ шет елдерде жасалатын ота жайын тек министрлік шешеді деп отыр.
Ал олар бас тартқан ақшаны аудандағы емге мұқтаж өзге де балаларға үлестіріпті.
Нұрболат Жаңабекұлы, Влад Шишко
Бізді әлеуметтік желіде оқыңыздар:
Youtube -[ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
WhatsApp Информбюро +7 777 331 31 31
#ӘділдікІздегенӘке #ШҚО
