Quraqlıq Cənub bölgəsində məhsuldarlığı aşağı salıb. Aqrotexniki qulluğa baxmayaraq, təsərrüfatlarda portağal azdır, olanların da ölçüsü kiçikdir.

Astarada portağal bağlarında məhsudarlıq xeyli aşağıdır. Ötən il bir ağacdan əgər 40-50 kiloqram meyvə dərilirdisə, bu il quraqlıq səbəbindən təsərrüfatçılar bir ağacdan bu rəqəmin heç yarısı qədər də portağal yığa bilməyiblər.

Təsərrüfatçı Almaz Rəhmətova: “Bu il məhsulumuz bir azdır. 10-15 kq bir ağacdan məhsul dəririk. Suyumuz az olub ona görə də məhsul yoxdur.”

Təsərrüfatçıları narahat edən digər məqam isə məhsulun satışı ilə bağlıdır. Onlar qiymətlərin aşağı olmasına görə indi məhsulu bazara çıxarmırlar. Portağalı uzun müddət saxlaya bildikləri üçün Novruz bayramı ərəfəsində satmağı düşünürlər.

Təsərrüfat sahibi Məzahir Rəhmətov: “Mənim təsərrüfatımda 10-15 ədəd meyvə ağacı var. 100-150 kq məhsul dərə bilərəm. Portağal elə bir meyvədir ki, onu mart ayına kimi saxlamaq olur ki, baha qiymətə satmaq üçün. İndi satsan bir qiymətə gedməz. Bayram vaxtı 1 manat 50 qəpik və ya 2 manata sata bilərik.”

Xarici ölkələrdən sitrus meyvələrinin idxal olunması yerli məhsulun qiymətini bir qədər aşağı sala bilər. Bu da meyvəni min bir əziyyətlə yetişdirən təsərrüfatçıların narazlığına səbəb olacaq.

Təsərrüfat sahibi Ağadadaş Qəmbərov: “Xaricdən sitrus meyvələri gətirilməsə burada meyvələr çox gözəl qiymətə gedər. Əgər xarici məhsul olarsa bu heç bir manata da gedməz. Əgər xarici məhsul gəlməsə 1 manatla 2 manat arasında portağalın qiyməti olacaq bu il.”

Əsasən yerli bazara çıxarılan portağalın yığımı dekabrın ilk ongünlüyünə kimi davam edəcək.

свернуть