Павлодар облысында қарлы боран соғып 117 ауыл жарықсыз қалды. Дүлей дауылдан электр сымдары үзіліп, бағдаршамдар істемей қалған. Соның салдарынан қала ішінде қозғалыс қиындады. Жарықтан бөлек жылу мен судан ажыратылған елдімекендер де көп. Бораннан қаланың бас шыршасы да құлап қалған. Еліміздің көп өңірлерінде де ауа райы құбылып тұр. Толығырақ әріптесім Аяулым Рахымжанова баяндасын.
Павлодарда кешелі бері ақтүтек боран басылмай тұр. Қатты желдің салдарынан қаланың бірнеше шағын ауданында жарық өшіп, бағдаршамдар істен шыққан. Өңірдегі 117 ауылда электр жарығы өшті. Кей ауылдар жылу мен судан да ажыратылған. Қолайсыз ауа райына байланысты республикалық және облыстық маңызы бар тас жолдардың 20-дан астам учаскесіне шектеу енгізіліп, полиция бекеттері қойылды. Жолда қалған 80-ге тарта адамға көмек көрсетілген. Ал Баянауыл ауданында мал қарауға шығып қайта оралмаған адам іздестіріліп жатыр.
АСҚАРБЕК ОМАРОВ, Павлодар облыстық төтенше жағдайлар басқармасының бастығы:
– Құтқарушылар екі авариялық құтқару жұмыстарын жүргізді тас жолдарда. Оның себебінен сегіз адам және екі бала құтқарылып, 4 адам эвакуацияланды және 11-ші қаңтар күні сағат 3-тен 50 минут кеткенде Төтенше жағдайлар департаментіне Баянауыл ауданында малшы жоғалғаны туралы хабарланды. Қазір осы малшыны іздестіру жұмыстары өткізіліп жатыр.
Кеше түнде желдің жылдамдығы секундына 37 метрге дейін жеткен. Дүлей дауыл бес ауыл мектебінің шатырын ұшырып әкетті. Қазір келтірілген залал көлемі есептеліп жатыр. Сондай-ақ 52 миллион теңгеге орталық алаңға орнатылған Жаңа жылдық шырша құлап қалды. Жергілікті жұрттың наразылығынан кейін қала әкімдігі құлаған шыршаны жинап тастаған екен.
ОРАЗБЕК САЯХАТ, Павлодар қалалық әкімдігінің баспасөз хатшысы:
– Осы шыршаның құлауынан зардап шеккен адамдар жоқ. Бұл шыршаның негізгі құрылымы зақымдалған жоқ. Кейбір элементтері ғана зақымдалған. Сондықтан бұл шырша алдағы уақытта да пайдаланылатын болады.
Қатты желден Семейдегі шырша да құлаған. Жалпы, ауа райының қолайсыздығына байланысты бірқатар өңірлерде оқушылар қашықтан білім алуға көшті. Ақмола, Қарағанды, Ақтөбе, Шығыс Қазақстан облыстарында бораннан жолда қалған жүргізушілер көбейген. Құтқарушылар діттеген жеріне жете алмаған жандарға көмек көрсетіп жатыр. Синоптиктер алдағы күндері еліміздің бірқатар өңірінде боран соғып, қар аралас жаңбырдан соң көктайғақ болады деп болжайды.
Бізді әлеуметтік желіде оқыңыздар:
Информбюро 31 [ Ссылка ]
Informburo kz [ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
Біздің сайт: www.31.kz және www.informburo.kz
Біздің WhatsApp +7 777 331 31 31
#Информбюро #31арна #Жаңалықтар #БастыЖаңалықтар #Нашиновости #Сегодня #Қазақстан #31канал
