Azad Mirzəcanzadə neft-qaz sənayesinin aktual problemlərinin həllinə dair çox sayda qiymətli tədqiqatları ilə Azərbaycan elminə mühüm nailiyyətlər qazandırıb. Onun rəhbərliyi və bilavasitə iştirakı ilə dəniz və qaz-kondensat yataqlarının işlənilməsinin fundamental-nəzəri əhəmiyyətli metodları hazırlanaraq tətbiq edilib. Onun elmə olan sevgisi erkən yaşlardan özünü göstərib. Alim 15 yaşında ali məktəbə daxil olub. Gənc yaşlarından bir sıra uğurlara imza atıb.
Azad Mirzəcanzadə 500-ə yaxın elmi məqalənin, 100-ə yaxın monoqrafiya, dərslik, dərs vəsaitinin, eləcə də 50-dən çox ixtira və patentin müəllifi olub. Onun rəhbərliyi ilə 300-dən çox fəlsəfə doktoru, 120 elmlər doktoru hazırlanıb.
Bu gün Azad Mirzəcanzadənin xarici tələbələri öz ölkələrində yüksək vəzifələri tutur. Onlar öz uğurlarını görkəmli alimə borclu olduqlarını bildirirlər.
Azad Mirzəcanzadənin təkcə Azərbaycanda deyil, dünyada neft elminin inkişaf etdiriməsində misilsiz xidmətləri olub. O, Başqırdıstan, Tatarıstan, Qərbi Sibirdə neft və qaz yataqlarının işlənilmə nəzəriyyəsi və prakrikası, qeyri-xətti mexanika və tətbiqi riyazıyyatda yeni istiqamətlərin inkişafına təkan verib.
