Një ngjarje e rëndë u
regjistrua sot në Elbasan. Një 25-vjeçare ndërroi jetën ndërsa solli në jetë fëmijën e saj të parë na maternitetin e këtij qyteti. 25-vjeçarja nga fshati Katund i Ri, dyshohet të ketë pësuar një arrest kardiak pas lindjes, ç'ka i mori asaj jetën, ndërsa fatmirësisht foshnja gëzon shëndet të plotë. Familjarët e 25-vjeçares, të pranishëm në maternitetin e Elbasanit, akuzojnë mjekët për pakujdesi. Sipas tyre, pas përkeqësimit të gjendjes së saj shëndetësore, gjinekologu ka kërkuar ndihmë nga kolegët e kardiologjisë, sepse ka konstatuar probleme me zemrën. Familjarët pretendojnë se mjeku kardiolog ka mbërritur me vonesë, ndërsa nëna e re ndërroi jetë një orë pas lindjes. Sakaq do të jetë autopsia dhe hetimet do të përcaktojnë shkakun e vdekjes së 25-vjeçares nëse ka pasur apo jo neglizhencë nga ana e bluzave të bardha. Pas vdekjes së 25-vjeçares 1 orë pas lindjes ka reaguar Qendra spitalore e Elbasanit. Në një deklaratë për mediat, spitali thotë se e reja pësoi komplikacion, ndërsa mjekët dhanë shërbimin maksimal. Megjithatë pritet ekspertiza mjeko-ligjore për përcaktimin e shkakut te vdekjes se 25-vjeçares ne Elbasan. Por spitali nuk tregon orën e vdekjes së gruas së re. "Duke shprehur ngushëllimet familjarëve për humbjen e 25-vjeçares R. D., Spitali rajonal Elbasan sqaron opinionin publik ne lidhje me humbjen e jetës së 25-vjeçares" si vijon: Pacientja R. D. u paraqit në spital më datë 22.04.2019 në orën 10:25 paradite. Pacientja ka ardhur me urgjencë në spital, me barrë të vonuar 42-javëshe dhe është futur në sallë, ku mjekët asistuan lindjen e fëmijës, i cili erdhi në jetë në orën 11:50. Foshnja u reanimua dhe gëzon shëndet të mirë. Stafi mjekësor ka dhënë trajtimin e duhur mjekësor, por nëna e re dyshohet se pësoi komplikacion postoperator trombemboli pulmonare, e papajtueshme me jetën. Aktualisht priten rezultatet e ekspertizës mjeko-ligjore për shkakun e vdekjes së nënës", deklaron spitali.

свернуть