ՀՀ ազգային հերոս, Արցախի հերոս, ռազմական և պետական գործիչ Վազգեն Սարգսյանի ծննդյան 60-ամյակի առթիվ մարտի 5-ին ՀՀ նախագահ Արմեն Սարգսյանը, Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսի, Ազգային անվտանգության խորհրդի անդամների, բարձրաստիճան զինվորականների հետ «Եռաբլուր» զինվորական պանթեոնում ներկա է գտնվել Սպարապետի հիշատակին նվիրված ոգեկոչման արարողությանը:

Շնորհավորելով ներկաներին Վազգեն Սարգսյանի ծննդյան 60-ամյա հոբելյանի կապակցությամբ՝ ՀՀ պաշտպանության նախարար Դավիթ Տոնոյանը կարևորել է Վազգեն Սարգսյան անհատի, ռազմական ու քաղաքական գործչի դերը հայոց նորագույն պատմության և համազգային հաղթանակների կերտման գործում: «Այս օրը ևս մեկ առիթ է երախտագիտությամբ հիշելու ժողովրդի կողմից Սպարապետի կոչմանն արժանացած մարդուն, խոնարհվելու նրա ծնողների, հարազատների առջև, վերագնահատելու նրա գործն ու պատգամները, վերաիմաստավորելու և նոր հունի վրա դնելու այն գործերն ու ձեռնարկումները, որոնք սկսել են Վազգենն ու իր ընկերները: Վազգեն Սարգսյանը մի կողմից երկրապահ էր, մյուս կողմից՝ գրող, մտավորական: Բայց նա նաև այդ երկուսի միասնությունն էր, և նրա անունը հավասարապես կապված է հայոց կանոնավոր բանակի կազմավորման, կամավորական շարժման և Երկրապահ կամավորականների միության հիմնադրման հետ»,- նշել է Դավիթ Տոնոյանը:

Արարողության մասնակիցները ծաղիկներ են խոնարհել սպարապետ Վազգեն Սարգսյանի, զորավար Անդրանիկ Օզանյանի հուշաքարերին և հայրենիքի անկախության համար իրենց կյանքը զոհաբերած հայորդիների հիշատակը հավերժացնող հուշապատին:

* * *

Մարտի 5-ին ՀՀ պաշպանության նախարար Դավիթ Տոնոյանն այցելել է ՀՀ Ազգային հերոս Վազգեն Սարգսյանի ընտանիքին և շնորհավորել սպարապետի ծննդյան օրվա առթիվ։

Պաշտպանական գերատեսչության ղեկավարը, ԶՈՒ ԳՇ պետի և սպայակազմի ուղեկցությամբ ծաղիկներ է խոնարհել սպարապետի հուշարձանին, շրջել պետական – քաղաքական - հասարակական գործչի տուն-թանգարանում, ծանոթացել առաջին անգամ ներկայացված ցուցանմուշներին։ Դավիթ Տոնոյանը գրառում է կատարել թանգարանի հուշամատյանում։

Դավիթ Տոնոյանը տուն-թանգարանին է հանձնել պաշտպանության նախկին նախարար Վազգեն Սարգսյանի` 1992 թվականի մարտի 5-ին ստորագրած հրամաններից մեկի բնօրինակը։

* * *

Մարտի 5-ին Կարեն Դեմիրճյանի անվան մարզահամերգային համալիրում տեղի է ունեցել տոնական հանդիսություն՝ նվիրված Հայաստանի ազգային հերոս, Արցախի հերոս, սպարապետ Վազգեն Սարգսյանի ծննդյան 60-ամյա հոբելյանին:

Նախքան հանդիսության համերգային մասը` ելույթով հանդես է եկել ՀՀ նախագահ Արմեն Սարգսյանը` անդրադարձ կատարելով պետական-քաղաքական-հասարակական ականավոր գործչի կյանքի հերոսական էջերին ու անցած մարտական ուղուն:

свернуть