Milli Məclisin iclasının əvvəlində Xocalı soyqırımının ildönümü ilə bağlı deputatların gördüyü işlər, parlament səviyyəsində keçirilən görüşlər, xarici ölkələrdə təşkil olunan tədbirlər haqqında məlumat verildi.
“Xocalı soyqırımı ilə bağlı beynəlxalq səviyyədə iş aparıldığını deyən Milli Məclisin sədri Oqtay Əsədov bildirib ki, hazırda Avropa parlamentində Xocalı soyqırımı ilə bağlı bəyanat hazırlanır. Sonra parlamentarilər gündəlikdəki digər məsələlərin müzakirəsinə başlayıblar. Hüquq siyasəti və dövlət quruculuğu komitəsinin sədri Əli Hüseynli bildirib ki, Milli Məclis ötən il “Cəza siyasətinin humanistləşdirilməsi ilə bağlı prezident sərəncamının icrası ilə bağlı durumu araşdırıb. 2017-ci il dekabrın 1-dən indiyədək məhkəmələrə qanunun tətbiqi ilə bağlı 4 mindən artıq təqdimat göndərilib
“Bu təqdimatlara əsasən, 479 məhkum azad olunub, 585 məhkumun azadlıqdan məhrumetmə cəzasının müddəti azaldılıb, digər cəzalara məhkum edilən 465 məhkum isə bu cəzalardan azad ediliblər. 59 məhkumun isə cəzaçəkmə rejimi yüngülləşdirilib”.
Qeyd olundu ki, hazırda məhkəmələrdə bu qanunun tətbiqi ilə bağlı 1700 təqdimat mövcuddur. Bundan əlavə, 5 min məhkumla bağlı təqdimat göndərilməsi nəzərdə tutulur. Çıxış edənlər bu qanunun amnistiya qüvvəli qanun kimi qəbul olunduğunu bildirdilər.
Bundan sonra Milli Məclis Azərbaycanla Türkiyə arasında 2017-ci ildə imzalanan iki sazişi ratifikasiya etdi. Sənədlərdən biri müdafiə sənayesi sahəsində əməkdaşlığı, digəri təhsil sahəsində əməkdaşlığı əhatə edir. Milli Məclis “Patent haqqında”, “Texniki tənzimləmə” haqqında qanun layihələrini birinci oxunuşda müzakirəyə çıxardı. Bundan əlavə, Qida Təhlükəsiziyi Agentliyinin yaradılması və ona səlahiyyətlərin verilməsi ilə əlaqədar bir sıra qanunlara dəyişikliklər paketi qəbul edildi. Parlament həmçinin “Azərbaycan avtomobil yolları 100 il” adında yubiley medalının təsis edilməsi haqqında əsasnaməni və buna uyğun olaraq mövcud qanunvericiliyə dəyişikliyi qəbul etdi. Milli Məclisin iclasında ümumilikdə 19 sənəd müzakirəyə çıxarılaraq təsdiqləndi.
