Иран мен Ирак шекарасының маңындағы 7,6 балдық жойқын жер сілкінісінен қаза тапқандардың саны сағат санап өсіп барады. Дәлірек айтсақ, Иран аумағында 328 адам жазымнан жан тапсырған.
Тағы 4 мыңға жуық тұрғын жараланған. 70 мыңдай адам баспанасыз қалды. Ал Иракта 8 адам көз жұмып, 400-ге жуық жергілікті тұрғын жапа шекті. Зілзала ошағы Иранның Сарполь-э-Захаб қаласынан солтүстікке таяу 32 шақырым жерінде кіндігі 10 шақырымға жуық тереңдікте тіркелген. Кей деректерге қарағанда сілкініс болған жерде дүмпудің күші 9-10 балға жеткен. Табиғат апатынан Иран елінің батысындағы Керманшах пен Илам өңірі қатты зардап шекті. Сонымен қатар Ирак жерінде үйлер мен ғимараттар қираған. Апат аймағында іздестіру-құтқару жұмыстары жүріп жатыр. Жапа шеккендерге азық-түлік, жылы көрпе таратылып, дәрігерлік көмек көрсетіп жатыр.
Жергілікті тұрғын:
- Мен жер сілкінісі болған кезде үйден қашып шықтым. Бірақ аяғым тайып сүрініп, шынының сынығы қолымды кесіп кетті. Әйтеуір Құдай сақтап, аман қалдым.
