Կառավարությունն այսօրվա նիստում ընդունեց 2008 թվականի մարտի 1-ից 2-ը Երևանում տեղի ունեցած իրադարձությունների ժամանակ տուժած անձանց աջակցության տրամադրման վերաբերյալ նախագիծը։
«Աջակցության տրամադրման համար դիմումը նախատեսված անձինք անձամբ կամ իրենց ներկայացուցչի միջոցով կարող են ներկայացնել Հայաստանի Հանրապետության արդարադատության նախարարություն՝ սույն որոշումն ուժի մեջ մտնելուց հետո 3 տարվա ընթացքում», - գործադիրի նիստում զեկուցեց արդարադատության նախարար Ռուստամ Բադասյանը: - «Ամրագրվում է, որ ստացված բոլոր փաստաթղթերի համադրման և գնահատման արդյունքում պարզված հանգամանքների հաշվառմամբ լիազոր մարմինը կայացնում է հետևյալ պատճառաբանված որոշումներից մեկը՝ բավարարել դիմումը և տրամադրել աջակցություն կամ մերժել դիմումը, կասեցնել դիմումի քննարկումը»:
Մարտի 1-ին զոհված քաղաքացու իրավահաջորդին պետությունը 30 միլիոն դրամ կտրամադրի, առողջությանը ծանր վնաս հասցված անձին՝ 15 միլիոն, առողջությանը միջին ծանրության վնաս հասցված անձին էլ 5 միլիոն դրամ։ Վարչապետը կարևորում է որոշումն ու խոսում, իր ձևակերպմամբ, նրբությունների մասին։ 2008-ին որպես ընդդիմադիր՝ հարթակից ելույթ ունեցող, ապա Մարտի 1-ի գործով բանտում մոտ երկու տարի անցկացրած Փաշինյանի խոսքով՝ գործադիրը ոչ թե փոխհատուցում է տրամադրում, այլ աջակցություն։ Վարչապետը գերադասում է, որ Մարտի 1-ին զոհվածների հարազատներին և տուժածների փոխհատուցում տրամադրելու գումարի չափը Մարդու իրավունքների եվրոպական դատարանում որոշվի։
