Фыдыбæстæйы Стыр хæсты фæмард 27 милуан адæймагмæ 'ввахс. Хъæбатырты мысынц æгас бæстæйы. Йæ райгуырæн бæстæйы сæраппонд йæ цард чи ратта, уыдоны 'хсæн уыдысты Гуыриаты æфсымæртæ дæр. Уыдон фондзæй ацыдысты хæстмæ, фæлæ дзы иу дæр фæстæмæ нал сыздæхт.
Майрæмададжы ацыдысты мысæн мадзæлттæ. Суаргомы хъахъхъæнджыты музейы кусджытæ алы дæр сæхи бацæттæ кæнынц ацы бонмæ. Абон ам кадджын уазджытæ, æфсæддонтæ, ветерантæ бынæттон цæрджытимæ иумæ æфсымæрон ингæны уæлхъус æрымысдысты, сабырдзинады сæраппонд йæ цард чи радта æмæ йæ Фыдыбæстæ знагæй чи бахъахъхъæдта, уыдоны рухс нæмттæ.
Музейы цы намысы уат ис, уым байгом кодтой Гуыриаты фондз æфсымæримæ баст дзауматы равдыст. Уыдон дæр æппæт Советон адæмы æмрæнхъ æрлæууыдысты хæцæнгарзимæ. Хъыгагæн, иунæг дæр дзы йæ фыды уæзæгыл нал сæмбæлд.
Чысыл Ирыстонæй хæсты быдырмæ ацыд 90 мин адæймагæй фылдæр. Уыдонæн сæ фылдæр мæлæт ссардтой хæсты быдыры знагимæ тохгæнгæйæ.
1941 аз 22 июнь нымад у Уæрæсейы историйы ахсджиагдæр цауыл. Æппæт Уæрæсейы дæр арæзт цæуынц мысæн мадзæлттæ. Сæ кадджын æмзæххонты, Фыдыбæстæйы Стыр хæсты хъæбатырты æрымысыдсты Ирыстоны дæр, сæ цыртыты раз сын сæвæрдтой диндиджытæ, минут æдзæмæй алæууыдысты.
_________________________
Мы рядом в:
vk.com/irystontv
instagram.com/irystontv
youtube.com/irystontv
twitter.com/irystontv
ok.ru/irystontv
