[ Ссылка ]
على حلو اللحن غنيت له والضيق قافيني
نويت مواصله لكن ظروفي مالها نيه
من فراق الحبايب يا عرب منهو يداويني
جروحٍ في وسط قلبي تسهرني ومخفيه
هجرت النوم واليا من نشدت الله معافيني
اسولف والضماير تدمي بضحكه صناعيه
اجامل صاحبي في قعدتي والهم كافيني
يسافر بي على كيفه وكن محدٍ حواليه
على درب الهواجس ضاريٍ والشوق حاديني
دلايل بالملامح واضحه واشياء نفسيه
وجر الصوت يا عبدالله ولحنك يسليني
يبي يمضي العمر حاجاتنا ماهي بمقضيه
مدام الرزق يرضيني واقل الوصل يرضيني
ولو كانت مواصيله على كلمات نصيه
يواخذني وياخذني ويوصلني ويجفيني
عشقني عشق عاقل لكن بصوره جنونيه
ابو وجهٍ خذا سحره من ورود البساتيني
بساطه في ملامحه وطبايعه الطبيعيه
اليا سلهم غديت بدنيته والرمش يدعيني
ولا سولف اضيع خاطري واقول وش فيّه
الين هبوب عذاله تصافق بينه وبيني
غدينا بالخلا وردٍ تعذّبه الشماليه
واهو قبل اتكلم كان يفهني ويوحيني
على خطوه نبت فرحي وقاع الحزن مطويه
رفيقي لا تلوم الدمع لامن هلته عيني
فلا هلّت دموعي غير من بعده وطاريه
تجاذبني لحوني والقصيد ابها يشاكيني
حروفٍ عندنا بالكيف ماموره و منهيه
