Шанхай ҳамкорлик ташкилотининг Қирғизистон пойтахти Бишкекда жорий йил 14-15 июнь кунлари ўтадиган навбатдаги саммитида Шинжон -Уйғур мухториятидаги уйғурлар, этник қозоқ ва қирғизларга Хитой ҳукумати томонидан босим кўрсатилаётгани масаласи муҳокама қилинмайди.
Қирғизистон президенти маъмуриятининг ташқи сиёсат бўлими бошлиғи Данияр Сидиков матбуотга мана шундай мазмунда баёнот берди.
БМТнинг 2018 йил август ойида ўтказган текшируви натижасида Шинжон-Уйғур мухториятида 1 миллионга яқин мусулмон «экстремизмга қарши кураш» баҳонасида «қайта тарбиялаш лагерлари»да сақланаётгани аниқланган. Хитой бу маълумотларни инкор қилиб келаётган эди.
Хитойга қўшни бўлган Қирғизистон ва Қозоғистонда бунга қарши қатор намойишлар ўтказилди. Бишкекда ўтган сўнгги митингларда эса мамлакатдан хитойликларни депортация қилиш, “қайта тарбиялаш лагерлари”да сақланаётган этник қирғизларни ҳимоя қилиш талаб этилди.
Қозоғистон ҳукумати жамоатчилик босими остида Хитой билан босимга учраётгани айтилган 2 минг нафар этник қозоқни Қозоғистонга чиқарилиши тўғрисида келишувга эришилганини билдирди.
Бироқ Қирғизистон президенти маъмуриятининг ташқи сиёсат бўлими бошлиғи Данияр Сидиков Хитойдаги этник қирғизларнинг ҳуқуқларини талаб қилаётганларни “қўшни давлат билан муносабатларни ёмонлаштиришга ҳаракат қилувчилар”, деб атади.
