№20 мектептің 5-сынып оқушысынан қызылша ауруы анықталды. Бұл жайтты бүгін мектептің директоры Ольга Бажитова растады. Баламен жақын қарым-қатынаста болған оқушылар мен мұғалімдер қазір дәрігердің бақылауына алынған. Ал, қызылшаға қарсы қосымша вакцина егу науқаны елде 4-мамырға дейін тоқтатылды. Елдің бас санитарлық дәрігері Жандарбек Бекшин кеше осындай бұйрық шығарды. Ақтөбеде қызылшадан қорғайтын вакцинаны 45 мыңнан астам жасөпірім алып үлгерген. Біздің облысқа моновакцинаның 47 мың 500 дозасы әкелінген. 1 мың 430 дәрі қолданылмай қалды. Ампулалар облыстық дәрі-дәрмектер қоймасында сақтаулы. Елге бір партиямен келіп, бір мезетте егілген вакцинаның әсері неліктен әр түрлі? Мамандар бар гәп дәрінің сақталуында болуы мүмкін дейді. №1 қалалық емхананың дәрігерлері науқан кезінде осы мекемеде есепте тұрған 600 жасөспірімге екпе салған. 300 вакцина кері қайтарылды. Соңғы кездері мектеп оқушыларына салынатын манту сынамасына да ата-аналардың күдігі көп. Туберкулез дертінің бар-жоғын анықтайтын екпеден кейін балалардың қолдары жиі ісіп кететін болып жүр. 4-5 айдан бері облыста өкпе дертін анықтаудың өзге тәсілі - диаскинтест қолданылып келеді. Ерітінді кәдімгі екпе секілді. Әсері манту сынамасындағыдай 72 сағаттың ішінде байқалады. Бірақ, диаскинтест тәуекел тобындағы балаларға ғана жасалады. Өткен жылы облысқа Ресейде жасалатын ерітіндінің 240 құтысы әкелінген. 100 шақтысы қолданылып болды. Биыл тағы 180 құтыға тапсырыс берілді.
