Атырау облысында болған жол- көлік апаты көпшіліктің жағасын ұстатты. "Вольво" мен "Уаз" автокөліктері бір-біріне қатты соғылып, кесірінен бір адам тірідей жанып кеткен. Жантүршігерлік оқиға Ақтөбе-Атырау-Астрахань тас жолындағы Тұщықұдық елді мекенінің маңында болған.
"Вольво" темір тұлпарын басқарған түрік азаматының қарсы бағытқа шығып, "Уаз" көлігіне соғылады. Қатты соққыдан, "Уаз" автокөлігі бірден қызыл жалынға оранған. Әбүйір болғанда, ауылдық инспектор мен жол полиция қызметкері жедел жетіп, төрт жолаушыны құтқарып қалған. Ал алдыңғы орындықта отырған 28 жастағы азаматты аман алып қалу мүмкін болмаған. Денелерін әртүрлі күйік шалған төрт адамның бірі ауруханада көз жұмды.
Гүлнәзира Мұхтарова, ІІД Баспасөз қызметінің жетекшісі:
Осыған орай, жүк көлігінің жүргізушісіне қатысты қозғалған қылмыстық іс қайта дәрежеленіп, ҚР Қылмыстық кодексінің 296- бабының 3-бөлігімен, яғни бірнеше адамның өліміне соқтырған жол көлік оқиғасына кінәлі ретінде қылмыстық іс қозғалды. Қазір ол азамат Исатай аудандық Ішкі істер бөліміне уақытша оқшаулау орнына қамауға алынды.
