لەباخا تۆی گوڵ و هەم باخەوانم
گوڵی وەسڵت لەبەرچی هەڵوەرانم
هەتیوم ، بێ نسیبی نازی چاوت
گەلێکت داوە داخ و دەرد نیشانم
دەمێ مات و دەمێ بێتاقەتی تۆم
لەکونجی غەم ڕەفیقی ئێش و ژانم
لەسجنی پڕ لەتەعزیبی فیراقت
دەرم بێنە ، هیلاک و بێ وچانم
لەچاوانم هەڵمگرتووی هەتا هەم..
بکەم سەیرت کەچۆنی ، ڕۆح و گیانم
وەرە و دیسان بەلوتفی تاهیرانەت
بەجۆش بێنە دڵ و خامەی بەیانم
هەتا باسی ئەوینی پڕ لەڕازت
بڵێم بۆ دەردەدارانی زەمانم
قەزای چاوت لەچاوی عاشقانت
ئومێدی بۆ شیفای دەردی گرانم
مەگەر سەر تاقەدەم هەر قوڕ بپێوم
کەمەحروومم لەئارامیی دڵانم
لەسەرمایەی کەلامی شەککەرینت
هەژارم ، کوا زەکات ؟ یاری نیانم
ئەگەر بخوێنی غەمنامەی فیراقت
ئەزانی دەردە ئەشعاری زمانم
بەچاوی دڵ تەماشاکەی لەحاڵم
ئەبینی چەن پەشێو و نیگەرانم
بەڕۆژ مەشغووڵی زکری چاوەکانت
بەتۆ ڕووناکە ئەی شەمعم ، شەوانم
لەسەحرای پڕ لەسامی دێوی نەفسم
مەگەر سایەی ئەوینت بێ ئەمانم
بەچاوانت لە (ماتی) یەک نەزەرکە
کەشێوەت بۆتە نەخشی چاوەکانم
شیعر:ماتی
خوێندنەوەی:کاک سید یەعقوب
تەکیەی شێخ حسێن شێخ کاکە حەمەی کەسنەزان-مەریوان
لینکی تێلێگرام ⬇⬇
[ Ссылка ]
