Mehriban xanım Əliyeva Azərbaycan cəmiyyətində möhtəşəm ictimai missiyanın daşıyıcısı kimi tanınır və qəbul olunur. Əgər bu missiyanı səciyyələndirsək, buna humanizm və xeyirxahlıq simvolu adını vermək daha düzgün olar.

Bu fikirləri Baş Nazirin müavini, Yeni Azərbaycan Partiyası Sədrinin müavini-İcra katibi Əli Əhmədov, Azərbaycan Respublikasının Birinci-vitse prezidenti, Heydər Əliyev Fondunun prezidenti, Yeni Azərbaycan Partiyası Sədrinin müavini, YUNESKO və İSESKO-nun xoşməramlı səfiri Mehriban Əliyevanın gördüyü işlərə həsr olunan “Şəfqətin və xeyirxahlığın ünvanı-Mehriban Əliyeva” mövzusunda keçirilən videokonfransında səsləndirib.

Ə.Əhmədov vurğulayıb ki, bu və ya digər səbəblərdən müxtəlif çətinliklərlə üzləşən ailələr problemlərindən Mehriban xanım Əliyevanın diqqəti və qayğısı sayəsində çətinliklərdən çıxıblar. Minlərlə uşağın müalicə olunması və çox sayda uşağın təhsil almaq imkanı əldə etməsi Azərbaycan Respublikasının Birinci vitse-prezidenti Mehriban Əliyevanın sayəsində mümkün olub.
Əli Əhmədov deyib ki, Mehriban xanım Əliyevanın böyük humanizmi və xeyirxahlığı COVID-19 pandemiyasının tüğyan etdiyi indiki günlərdə daha bariz şəkildə özünü göstərir. Azərbaycan ictimaiyyəti onun diqqəti və qayğısı sayəsində neçə-neçə insanların öz sağlamlığına qovuşmasına, ölümün cəngindən xilas olmasına şahidlik edib.

YAP Sədrinin müavini qeyd edib ki, Azərbaycanın mədəniyyətinin, incəsənətinin, təhsilinin inkişafı, tariximiz və milli mənəvi dəyərlərimiz də Mehriban xanımın daim diqqətindədir. Heydər Əliyev Fondunun prezidenti kimi onun həyata keçirdiyi möhtəşəm layihələr nəticəsində Azərbaycanın mədəniyyəti, incəsənəti, milli-mənəvi dəyərlərimiz yeni inkişaf mərhələsinə yüksəlib.

Tədbirdə çıxış edən Azərbaycan Tibb Universitetinin rektoru Gəray Gəraybəyli Birinci vitse-prezident Mehriban xanım Əliyevanın genişmiqyaslı fəaliyyətinin əhəmiyyətindən bəhs edib. O qeyd edib ki, son illər ölkəmizdə yüzlərlə yeni tibb müəssisəsi tikilib və ya əsaslı təmir olunub, səhiyyənin maddi-texniki bazası əhəmiyyətli dərəcədə gücləndirilib.

Daha sonra çıxış edən Milli Məclisin Ailə, qadın və uşaq məsələləri komitəsinin sədri Hicran Hüseynova bildirib ki, Mehriban Əliyeva özünün həm ictimai- siyasi fəaliyyəti, həm də elmi yaradıcılığı ilə Azərbaycan qadınlarına nümunədir. O, müasir Azərbaycan qadın hərəkatının lideri kimi dövlətimizin tərəqqisi naminə geniş fəaliyyət göstərir.

Milli Məclisin Beynəlxalq münasibətlər və parlamentlərarası əlaqələr komitəsinin sədr müavini, YAP-ın Beynəlxalq əlaqələr şöbəsinin müdiri Sevinc Fətəliyeva isə çıxışında deyib ki, Mehriban xanım Əliyevanın rəhbərliyi ilə Heydər Əliyev Fondu Azərbaycan həqiqətlərinin dünya ictimaiyyətinə çatdırılması, o cümlədən Ermənistanın Azərbaycana qarşı təcavüzkar və işğalçılıq siyasətinin ifşa edilməsi istiqamətində məqsədyönlü və ardıcıl iş aparır.

Tədbirin sonunda Mehriban xanım Əliyevaya həsr olunan videoçarx nümayiş etdirilib.

свернуть