"Ел бойынша ең төменгі жалақы аламыз". Осылай деп шағымданған бір топ Түркістан қаласының балабақша тәрбиешілері бүгін облыс әкімдігінің алдына жиналды. Олар өңірде балалар үшін адам басына төленетін қаржыны көтеруді сұрады. Айтуларынша, барлық республикадағы балабақшалардың қызметкерлері білім және ғылым министрлігінің 2017 жылы арнайы бұйрықпен бекіткен қаржысын алып отыр. Ол елдімекен, қала статусына қарай 37 мыңнан 48 мың теңгеге дейінгі аралықта. Ал Түркістан қаласында бар-жоғы 19 мың теңгені құрайды дейді наразылық білдіргендер.
Төрт жылдан бері тиесілі қаржыдан қағылып келеміз деген жүзге тарта балабақша тәрбиешісі облыс әкімдігіне талаптарын плакаттарға жазып, арқалай келген. Жан басына шаққанда қаржының ең азы Түркістанда дейді олар. Соның салдары тікелей еңбекақымызға кері әсер береді деп отыр. Республиканың басқа өңірлері 150 мың теңге жалақы алса, бізде ол бар-жоғы 60 мың теңге ғана дейді тәрбиешілер.
ДІЛБАР ЕРГЕШОВА, Жекеменшік балабақшалар қауымдастығының төрайымы:
– Қырық мың адамның артында үш адамнан болғанда 120 мың адам осы бала-бақшалардың алдында күнін көріп отыр. Біз оларға қалай түсіндіреміз? Бізге бір тиын қосып бермесе. Үш жылдан бері қанша инфляция болып жатыр. Қанша заң қабылданып жатыр. Сонда ол заңдар, педагог мәртебесі туралы заң, білім министрінің бұйрықтары бізге тиесілі емес пе?!
ДАНА БАБАЕВА, балабақша тәрбиешісі:
– Өз қалтамыздан шығады, көрнекіліктің барлығы. Қарызға белшемізден баттық. Біз басшылыққа жалақыны көтер десек ол жалақыны көтермейді.
2017 жылға дейін Түркістан облысындағы әрбір мектеп жасына дейінгі баланы күтіп-бағуға 19 мыңға жуық теңге бөлінген еді. Содан кейін тиісті бұйрық шығып, оған сай жан басына шаққандағы қаржыландыруды біртіндеп көтеру қажет болған. Алдымен 30 150 теңгеге, кейін 35-48 мың теңгеге дейін ұлғайту керек еді. Тиісінше, тәрбиешілердің жалақысы да өсуі тиіс еді. Алайда, мұндай өзгеріс әлі күнге болмапты.
АМАНТАЙ ӨСЕРБАЕВ, Түркістан облысы адами әлеуетті дамыту басқармасы басшысының міндетін атқарушы:
– Осыған байланысты арасындағы айырмашылықты сұрап отырған уәждері бар. Ол уәжбен толықтай келісіп, оларға жүргізіліп жатқан жұмыстар бойынша толықтай түсіндірме берілді. Сонымен қатар бұл жұмыстардың ары қарай жалғасып жатқаны бойынша да түсіндірме берілді.
Облыста қазір 1024 жекеменшік балабақша бар. Балабақшаларға жетіспейтіні 26,6 миллиард теңге. Қаржының мәселесі бұған дейін де сан мәрте көтеріліпті. Әкімдік министрлікке нақты қаржыға қатысты хат та бергенін айтады. Алайда нәтиже болмаған. Мәселе биыл да шешілмесе, кәсіп иелері жұмысын тоқтатуға бел шешіп отыр.
.
.
.
.
Бізді әлеуметтік желіде оқыңыздар:
Youtube -[ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
WhatsApp Информбюро +7 777 331 31 31
#информбюро #басты_жаңалықтар #Ақиқатын_Айтайық
