Алматыдағы "Барахолка" базарынан тағы да шу шықты. Бұл жолы ұлыгерліктер өре түрегелді. Айтуларынша, әкімдік, тауары жанып кеткелі, "Ұлыгерді" жағалап жүрген кәсіпкерлерді көшеге қуып, сауда сөрелерін талқандап тастаған көрінеді. Амалы таусылған саудагерлердің бірінің қан қысымы көтеріліп, жедел жәрдем шақыруға мәжбүр болған.
АЯГӨЗ ИМАНОВА, "Ұлыгер" базарының саудагері:
Базарымызды өртеді, базарымызды төңкерді, енді қайда барамыз? Қаңғып қалдық қой...
Бұл кісілердің басым бөлігі - "Ұлыгер" базарында бұрыннан сауда жасап келген. Кейбірі қатарларына кейін қосылған. Естеріңізге сала кетсек, "Құлагер" базарын қызыл жалын шарпығанда, көрші орналасқан "Ұлыгер" шұғыл жабылып, саудагерлері саудасын базардың бұрынғы орнында, бірақ далада жасап жүрген еді. Олардың қатарына тауары жанып кетіп, жер сипап қалған кәсіпкерлер де қосылған болатын. Алайда, саудагерлер, енді аудандық әкімдіктегілер осы амалдап жүрген тірлігімізге түрпідей тиіп жатыр, деп шуласты.
- Қайда барамыз енді? Арзан бағаға да алмай жатыр? Сонда енді не істейміз? Цыган сияқты жүрміз.
-Халық күйіп жатыр, міне, күн бермей жатыр. Сасып кеткен квартирада жүрген халық, бала шағасын баға алмай жатқан халық.
-Жанып кеткен, содан бері осылай қаңғырып жүрміз. Банкрот жанып кеткен товар, нөлден бастаған өте қиын.
Наразы топтың айтуынша, Алатау аудандық әкімдігінің өкілдері, "Өжетке" орналастырамыз деп уәде де берген көрінеді. Тек онда қомақты қаражат талап етіп жатыр дейді.
АЯГӨЗ ИМАНОВА, "Ұлыгер" базарының саудагері:
Өжеттің директоры бізді итеріп итеріп қуып жіберді. 12 мың долларың жоқ па деді, дұнғандар. Жоқ болса, кет деп, былай итеріп-итеріп қазақтарды шығарып жіберді.
Түсіру тобы келгенше, саудагерлердің біріне жедел жәрдемнің көмегіне де жүгініп үлгерген. Аудандық әкімдіктегілер де базардан бірден табылды.
