İyunun 15-dən Azərbaycanda yay turizm mövsümünə start verilir. Yayın gəlişi ilə insanlar çoxdan gözlədikləri istirahət planlarını reallaşdırmağa başlayırlar. Bakının qızmar istisindən qorunmaq istəyən şəhər əhli üz tutur ölkənin dilbər guşələrinə. Yay tətilində Azərbaycana gələn turistlər isə həm paytaxtı, həm də məşhur kurort yerlərini gəzməyi arzulayırlar.
Turizm şirkətinin icraçı direktoru Əziz Şiriyev deyir ki, yaxın rayonlardan Quba, Qusar, Qəbələ, Şamaxı, İsmayıllı istiqamətinə, hətta Şəki və Masallı istiqamətinə bir günlük turlar olur: “İki günlük turlar Lənkəran, Lerik, Şəki, Zaqatala, Qax, Gəncə, Mingəçevir Göygöl və istiqamətinə turlarımız olur. Xaricə gedən yerli vətəndaşların əsas marağı Türkiyə istiqamətinədir. Bir azdan Dubay istiqamətinə maraq artacaq”.
Azərbaycan Turizm Assosiasiyasının İdarə Heyətinin üzvü Göydəniz Qəhrəmanov də deyir ki, daha çox Türkiyə istiqaməti populyardır: “Hazırda Antalya, Bodrum istiqamətləri daha çoxdur. Daxili turizmdə is göründüyü kimi, artım var. İyul ayında daha çox gözlənilir. Küveytə yeni reyslər açılacaq. Həmçinin başqa ərəb ölkələrindən daha çox artım olmalıdır”.
Azərbaycan turizm növlərinin müxtəlifliyi ilə seçilir. Bura üz tutan insanlar təkcə gəzmək məqsədilə yox, həm də sağlamlıqlarını bərpa etmək üçün gəlirlər.
Bu il Azərbaycanı seçən turistlərin sayında artım müşahidə olunur. Buna səbəb həm son illər turizmin inkişafı üçün infrastrukturun yüksək səviyyədə qurulması, həm də Azərbaycanın sabit və qonaqpərvər ölkə olmasıdır.

свернуть