فيديو النهاردة مهم جدا ومن اهم الخطوات اللى بتعمليها علشان تتشافى من العلاقه النرجسيه وتبدأى حياة جديدة مع النرجسي ومع كل اللى حواليكى بما فيهم اولادك
اولا قبل ما نبدأ عايزين نعرف يعنى ايه حدود الحدود هى قاعدة بنبنيها لنفسنا بتعرفنا ايه اللى كويس وايه اللى مش مقبول بالنسيه للناس اللى بتتعامل معانا واللى بتحاول تدخل حياتنا زى مثلا انا مش هسمح لفلان ينادينى بأسمى حاف كدة مش هسمح لفلانه وهى بتكلمنى تعلى صوتها وتتنرفز عليا مش هسمح للنرجسي انه يقولى انتى غبيه ومش بتفهمى حاجه مش هسمحله يقولى خلى عندك شويه عقل علشان احب بعد كدة اتكلم معاكى مش هسمحله يمد ايدة عليا مش هسمحله يعملى جازلايتينج ويشككنى فى عقلى هوقفه عند حدة وهنسحب تماما من المناقشه لغايه ما يعرف ان الللى بيعمله دة ما بقاش يجيب نتيجه معايا وانى بقيت فهماة مش هسمحله يتهمتى باتهامات كلها عيوب فيه هو ويعملى اسقاط عن اللى جواة كمان ممكن تكون الحدود اللى ببنيها تكون حدود ماليه يعنى ما اسمحش للنرجسي انه ياخد فلوسي ولا يستبيح كل ما املك بحجه ان الراجل ومراته مفيش فرق بينهم لا كل واحد ليه زمه ماليه مستقله ومفيش حاجه اسمها نبنى بيت بفلوسنا احنا الاتنين ويكتبه بأسمه هو لوحدة ولا فى حاجه اسمها نفتح حساب فى البنك بأسمه ونحط فيه فلوسي وفلوسه ويقولك ماهو كله لولادنا
الحدود عبارة عن خط بترسميه حوالين نفسك علشان توضحى اولوياتك وتأكى احترامك لنفسك وتبعدى الاشخاص السيئين عنك
انك تعملى حدود لنفسك دى مش حاجه وحشه ابدا ولا تعتبر انانيه بغض النظر عن ايه اللى بيقولهولك النرجسي الحدود هى اللى بتخليكى انسانه مش سهله مش اى حد يقدر يوصلك رسمك لحدودك جزء مهم جدا من احترامك لنفسك ودة اللى لازم تعمليه وتعلميه لاولادك لان دة جزء مهم جدا من بلوغهم سن الرشد بشكل صحى وبشكل ناجح
طيب ازاى بقه الحدود اللى بتبنيها بتؤثر على النرجسي وبيشوفها ازاى ؟
طبعا احنا عارفين ان النرجسي مش شخص طبيعى عارفين انه عندة شعور عالى جدا بالاستحقاق بيعمل اللى هو عايزة وقت ماهو عايز مفتقرتماما للتعاطف ما بيحسش هو ممكن كلامه يأثر على اللى قدامه ازاى ما يهمهوش اللى قدامه انجرح او لاهو من حقه يقول اللى هو عايزة ويتصرف زى ماهو عايز علشان كدة النرجسي بيكرة الحدود ومش هيعجبه ابدا ابدا انك تعملى حدود او تقوليله الزم حدودك او اقف عند حدك او ما اسمحلكش كل دة مش هيعجبه ابدا فلما تبداى تنفذى اللى بقولهولك دة طبعا توقعى رد فعل كبير من النرجسي هيعمل غضب نرجسي هيؤذيكى بكلامه هيشتم هيكسر كل دة علشان يخوفك ويخليكى تتراجعى عن اللى بتقوليه واللى بتعمليه ويرجع تانى يعمل اللى هو عايزة وقت ماهو عايز وبالشكل اللى يعجبه هو .علشان كدة بقولك ان الموضوع مش هيكون سهل
اول حاجه فى تعمليها علشان تحطى حدودك انك لازم تحددى ايه هى حدودك دى تعرفى ايه اللى هتسمحى بيه وايه اللى مستحيل تتهاونى فيه او تتسامحى فيه
تانى حاجه تعمليها انك توضحى حدودك دى او تقوليها بمنتهى الوضوح للنرجسي وماتبرريش ابدا ولا تحسسيه انك بتدافعى عن نفسك لان النرجسي لما بيفضل يتناقش معاكى فى حدودك دى او بيتستهزأ لما بتقوليله كدة فهو بيحاول يلخبطك وبيحاول يربكك وانتى للأسف بتديله الفرصه دى لما بتتجادلى معاة وكمان بتديله وقود لازم تكونى واضحه وحاسمه وكلامك يكون قليل لو تهاونتى ولو حاجه بسيطه عمر النرجسي ما هيهتم ولا هيعرف انك بتتكلمى جد بالعكس هيستهزأ بيكى وهيعرف انك ضعيفه وما تقدريش تعملى حاجه
تالت حاجه لما النرجسي يعمل معاكى اى اسلوب من اساليب التلاعب بتاعته سميها بأسمها يعنى لما يحاول يعملك اسقاط باللى جواة لما يقولك انتى كدابه وخاينه قوليله اة فهمت طبعا انت بتتكلم عن نفسك اللى بتعمله دة انا فهماة كويس اوى واللى جوالك بتحاول تتهمنى بيه لانك ماتقدرش تواجه نفسك بيه هنا النرجسي ما قداموش غير حاجتين يا اما يعرف ان طريقته دى ما بقيتش تنفع ويبطل يعمل كدة معاكى تانى يااما هينسحب من حياتك وفى الحالتين انتى الكسبانه المهم يعرف ان حدودك غير قابله للتفاوض اصلا
بس بالرغم من كل اللى بقولهولك دة اوعى تستهونى بالنرجسي ولا بعقله ولا بقدرته على التلاعب النرجسي زى ما بيقولوا كدة خبرة فى التلاعب بالاخرين ول عمرة بيعمل دة لما بقى محترف خلاص بقى سهل عليه جدا يقلل من قيمه اى حد وسهل جدا يستغل اى حد فلازم تبقى عارفه ايه الاساليب بتاعته وتبقى فهماها كويس علشان كدة لازم تقري كتير وتتعلمى كتير عن النرجسي وماتقوليش انا سمعت الكلام دة قبل كدة خلاص بقه انا زهقت مش كل حاجه كلام عن النرجسي لازم تعرفى عدوك كويس اوى وتزاكريه كويس اوى علشلن تقدرى تواجهيه
الموضوع ممكن ياخد شويه وقت وشويه محاولات ماتقلقيش وماتقوليش انا ضعيفه ومش قادرة عليه لو فشلى مرة مفيش مشكله حاولى تانى وتالت ورابع لغايه ماتقدرى كل مرة هتلاقى نفسك بتتعاملى احسن وبتاخدى ثقه فى نفسك اكبر
اخر حاجه بقه انك تعملى عقاب لاى حد يتعدى حدودة معاكى يعنى اللى هيتخطى حدودة دى لازم يبقى فاهم هيحصله ايه والا مش هياخد كلامك على محمل الجد وهيعتبرك بق على الفاضى لازم يعرف النرجسي او غيرة انه لو تخطى حدودة لازم يكون فى سعر لكدة لازم يدفع تمن تخطيه حدودك دى فكرى انتى ممكن تعملى ايه لو النرجسي تخطى حدودة معاكى مثلا لو قولتيله انا مش هسمحلك تمد ايدك عليا يبقى لازم تقوليله ولو دة حصل انا هعمل كذا مثلا هعملك محضر فى القسم او هتصل بالشرطه او هفضحك فى شغلك وهكلم رئيسك فى العمل وهنا مش هيعرف النرجسي ساعتها يقولك انا ماكنتش اعرف انك ممكن تعملى كدة
#ناجيه_من_جحيم_نرجسى

свернуть